Footer

2 nagkalap iti fish sanctuary, napagmulta

STA. MARIA, Ilocos Sur -Dua manen a mangngalap ti natiliwan nga illegal nga agkalkalap iti fish sanctuary iti Barangay Suso ditoy nga ili idi agsapa ti Hunio 6.

Natiliwan dagiti polis dagiti suspek a nainaganan Joseph Antolin y Domingo, 35, baro; ken Dante Ancheta y Duro, 53, naasawaan, agpada a residente iti Barangay Nalvo, ditoy met laeng nga ili, nga akto nga agkalkalap iti fish sanctuary iti sakup ti Sitio Balangen Barangay Suso iti agarup 9:30 ti bigat ti nadakamat a petsa.

Kinumpiska dagiti polis ti maysa a fish net, 2 a gaud, maysa a fish hook ken 3 spear guns, 2 a catch nets, 2 nga eye goggles, 2 a sea orchid ken nadumaduma a lames nga agdagsen iti aganay maysa a kilo.

Naipan dagiti suspek iti police station ditoy sada napagmulta iti opisina ti tesorero.

Maiparit ti agkalap iti nasao a fish sanctuary kas sinaguday ti maysa nga ordinansa nga impasa ti lokal a gobierno ditoy.#