Footer

6 menor de edad, nainbolbar nagsina a panagtakaw

VIGAN CITY – Dua a panagtakaw ditoy siudad a nakainbolbaran ti dua a grupo dagiti menor de edad ditoy siudad itay nabiit.

Iti report a dimmanon iti police station ditoy siudad, hinold-ap ti dua a menor de edad ti maysa a residente ti Barangay IX ditoy siudad idi parbangon ti Hunio 10, idinto nga akto a nasukalan ti uppat a menor de edad a simrek iti maysa a sari-sari store tapno takawanda itay lawasna.

Iti immuna a panagtakaw, agpada nga agtawen iti 17 dagiti suspek a residente iti Barangay VI ditoy siudad ken iti Barangay Tamurong, Caoayan, Ilocos Sur a mapapati nga armado idi tinakawanda ni Mark John Tumbaga y Arieta, 21, baro, ken residente iti Barangay IX, Vigan City.

Segun iti inisial nga inbestigasion, adda katulagan ni Tumbaga ken maysa kadagiti suspek a mapan iti kamposanto ditoy.

Saan a nailanad iti report no apay a napanda iti kamposanto.

Bayat ti kaadda dagiti dua iti nasao a lugar, simmangpet ti sabali pay a suspek ket mapapati a pinaturonganna ni Tumbaga iti paltog idinto a kinasakas ti kumplotna ti bag  ti biktima sana innala ti dua a selpon daytoy nga agpateg iti P10,000.00, ti petakana a naglaon iti P500.00, PhilHealth ID, ken Postal Id.

Natiliw dagiti suspek iti pursuit operation nga insayangkat dagiti nagreponde a polis.

Kabayatanna, uppat a menor de edad ti naireport a  nangserrek ti maysa a sari-sari store iti Brgy. 5, Vigan City itay lawasna.

Segun iti report, sinerrek dagiti di nainaganan a suspek (agsipud ta menor de edadda) iti tienda a kukua ni Maria Yabes a masarakan iti Barangay 5 ditoy siudad ket uppat a selpon ti kinasakasda.

Iti panagimbestiga dagiti polis, nakastrek dagiti suspek iti tienda babaen ti pananglukipda iti diding daytoy.

Segun ken ni SPO1 Sannypat Seguismundo iti Women and Children’s Protection Desk ti Vigan PNP, naipaiman dagiti suspek iti City Social Welfare Office para iti disposisionda.

Naammuan ti Tawid News a saanen a nagdarum ni Yabes kalpasan a binagbagaanna dagiti menor de edad a didan uliten ti inaramidda.#

 

Comments are closed.