Footer

Beterano iti WWII, ikkan ti prov’l gov’t iti PhilHealth cards

By Mancielito S. Tacadena

VIGAN CITY – Maikkan amin a beterano iti maikadua a gubat ti sangalubongan a taga-Ilocos Sur iti Philhealth cards tapno adda madadaan nga usarenda no agsakitda, daytoy ti  inwaragawag  ni Vice Governor Deogracias Victor Savellano bayat ti selebrasion ti Maika-67 nga Anibersario ti Ranget ti Bessang Pass a naangay iti Baluarte ditoy siudad idi Hunio 14.

“Lumallakay ken bumaketen dagiti beteranotayo isu a daytoy pannakaiyenrolda iti PhilHealth ti kapintasan a maisaguttayo kadakuada,” kinuna ni Savellano.

Ti provincial government ti mangibaklay iti premium dagiti PhilHealth cards a maiwaras kadagiti beterano.

Bayat ti programa, imbinsabinsa ni Brig. Gen. Arnulfo Bañez (ret.) ti USAFIP no ania ti napasamak kadagidi panawen a simmanglad dagiti Hapones iti Vigan agingga iti panangabak ti grupoda iti Bessang Pass.

Naikkan iti maysa a tribute dagiti maingel iti maikadua a gubat ti sangalubongan babaen ti panangited dagiti estudiante iti rosas iti tunggal beterano, kasukat ti iyawatda a bandera kadagiti ubbing.

Maysa met a re-enactment ti battle of Bessang Pass ti impabuya ti grupo a Buhay na Kasaysayan Group bayat ti programa.

Ti panagballigi dagiti Allied Forces iti ranget ti Bessang Pass ti nangitunda iti pannakarippuog ti puersa ni Hen. Tomoyuki Yamashita, nabirngasan iti   Tiger of Malaya.

Kabayatanna, kinuna ni Lt. Gen. Ernesto Carolina (ret), administrador ti Philippine Veterans Affairs Office (PVAO), a kasapulan a maiyistoria manen kadagiti ubbing ti kinapateg ti wayawaya.

“Kasapulan a maiyistoria manen no kasano ti kamaingel dagiti beterano a limmaban iti Bessang Pass tapno saan a malipatan dagiti ubbing ken tapno didanto met bumdeng a mangibuis iti biagda iti kanito nga agpeggad ti wayawaya ti pagilian,”  kinuna ni Carolina.

Mainaig iti daytoy, rimmuaren ti “The Freedom of Fighters of Northern Luzon: An Untold Story” a sinurat da Cesar Pobre ken Philip Kimpo ken “Victory in Northern Luzon” ni Cesar Pobre idinto nga adda metten iti imprenta ti “History at Bessang Pass” ni Ben Cal.

Agpapada dagitoy nga inggastuan ti PVAO tapno maiwaras kadagiti biblioteka iti amin a paset ti pagilian.#

Comments are closed.