Footer

Pagtaengan, tinakawan ti para bantay

MAGSINGAL, Ilocos Sur – Diyo panawan ti balayyo iti caretaker no diyo pay am-ammo unay ti kinatao daytoy.

Naleksion ti maysa nga agnaed iti Barangay San Basilio ditoy nga ili kalpasan a tinakawan ti tinudinganna a caretaker ti pagtaenganna bayat ti kaaddana iti Manila.

Nagreport iti polis ni Ceferino Garcia y Azcueta, 44, naasawaan, mannalon ken residente iti Barangay San Julian ditoy nga ili, a tinakawan ti maysa a managan Dong, mapapati a taga-Bicol, ti ulitegna a ni Richard Urbi y Divas, 70, baro, ken residente iti Barangay San Basilio ditoy met laeng nga ili.

Naduktalan ti panagtakaw idi nakita ni Garcia a nakalukat ti silaw iti uneg ti balay ti ulitegna bayat ti panagdalusna iti paraangan.

Idi simrek ni Garcia iti balay, nakitana laengen a nakalukat ti kuarto ti biktima ket naiwarawaran dagiti aruaten daytoy.

Madama ti panagimbestiga dagiti polis mainaig iti nasao a panagtakaw.#

Comments are closed.