Footer

Polis a nainbolbar iti indiscriminate firing, sumango iti kriminal, administratibo a kaso

BANTAY, Ilocos  Sur – Impasingked ti maysa a hepe iti provincial police office ditoy a saanda nga iyaleng-aleng ti napasamak nga indiscriminate firing a napasamak idi sardam ti Hunio 12 iti Sitio Sagsagat, Barangay San Sebastian, San Vicente, Ilocos Sur a mapapati a nakainbolbaran ti maysa a polis a nakadestino iti Magsingal Police Station.

“Saantayo a tolereyten daytoy nga insidente,” daytoy ti sungbat ni Police Superintendent Maximo Taclas ken ni Jun Ramos, anchor ti DWRS Barangay Brigada Commando a naipatangatang idi Hunio 15 idi masaludsod kenkuana no ania ti aksion ti PPO mainaig iti indiscriminate firing maikontra ken ni SPO1 Rogelio Resuello y Baptista, 38, naasawaan, ken residente iti Barangay Panay Sur, PNP member a nakadestino iti Magsingal MPS bayat ti maysa a birthday party iti balay ti kayongna a ni Federico Lopez y Riodil, 45.

Mapapati a nabartek ken arogante ti polis idi inimbitaran dagiti nagresponde a pannakabagi ti linteg ti San Vicente a maipan iti police station.

Nakarekobre dagiti polis iti dua a kapsula manipud iti cal. 9 mm pistol ken dua a kapsula manipud iti cal 5.56 iti mapapati a nakapasamakan ti indiscriminate firing.

Kinuna ni Taclas nga iti kaadu dagiti responsibilidad ti maysa a polis, saan a daydiay a situasion ti rumbeng a nakainbolbaran ni Resuello.

Kinuna ni Taclas a naipaiman iti provincial prosecutor’s office ti criminal aspect ti kaso nga alarm and scandal maikontra ken ni Resuello ket posible a mabalud, depende iti dagsen ti nagbasolanna.

Innayonna a mairefer met ti administrative case para iti summary hearing maikontra ken ni Resuello iti Internal Affairs Service ket no mapudasdasan a nakabasol, maikkat iti serbisio wenno masuspenso.

Kinuna ni Taclas a saan a maipabor ti inaramid ni Resuello iti disiplina a maipakpakat iti kapolisan.

Indagadag ni Taclas kadagiti umili ti panangireportda kadagiti “adda sabali nga aramidda” a polis tapno maaksionanda.

Iti pannakaisurat daytoy, adda iti kustodia ti hepe ti polis ti Magsingal ni Resuello ken nakumpiska ti ikutna a cal. 9 mm pistol.#

Comments are closed.