Footer

Truck a nagkarga kadagiti baboy, di pinalubosan polis-Sta. Catalina

STA. CATALINA, Ilocos Sur – Maysa a truck a nakailuganan dagiti baboy a masuspetsa a mailibas a mailako ditoy nga ili ti pinasardeng dagiti polis iti impasdekda a checkpoint ditoy idi agsapa ti Hunio 8.

Saan a pinastrek dagiti polis iti ili ti nasao a truck kalpasan a naduktalanda a sabali a lugar ti nailanad a destinasion dagiti karga daytoy a sangapulo ket tallo a baboy nga agdagsen iti sumurok kumurang 2,500 kilos ken agbalorda amin iti P220,000.00.

Iti panagpalutpot dagiti polis, natakuatan a kukua ti maysa a Marco Licnad y Andaya, 24, naasawaan, negosiante, ken residente iti Barangay Man-atong, Suyo, Ilocos Sur dagiti 13 a baboy a naikarga iti Isuzu Elf Truck nga addaan plate number XMD 421 a minaneho ni Joeferson Lata y Lopez, 27, naasawaan, ken residente iti Barangay Lubnac, Tagudin, Ilocos Sur.

Nupay adda Veterinary Health Certificate and Veterinary Shipping Permit  nga inyisio ti Bureau of Animal Industry, Office of the Veterinarian, San Fernando City, La Union idi Hunio 7, 2012, a mapapati a pinirmaan ni Nida N. Gapuz, DVN, MPA, provincial veterinarian, nailanad iti dokumento a Rosario, La Union ti point of origin dagiti baboy ken destinasionda ti Buguias, Benguet.

Nailanad pay iti dokumento a 12 laeng ti bilang dagiti baboy a karga ti truck.

Gapu iti saan nga agsusurot a detalye kadagiti dokumento, naipan ti truck agraman dagiti baboy ken ti drayber iti police station ditoy para iti umisu a disposision.

Iti kallabes, adda dagiti alegasion nga adda dagiti makalusot a baboy  a maiserrek ditoy probinsia iti quarantine checkpoint iti Barangay Bio, Tagudin, Ilocos Sur.

Dimmatag dagiti agtartaraken iti baboy ken ni Singson a nangipakaammuanda a dakkelen ti lugida gapu iti pannakaiserrek dagiti oversized a baboy manipud kadagiti kabangibang a probinsia nga amang a nalaklaka no maikumpara iti presio ti baboy ditoy probinsia.

Kas pangsalaknib kadagiti agtartaraken iti baboy iti probinsia, nangipaulog ni Gov. Luis “Chavit” Singson iti pammilin a mangiparit iti pannakaiserrek dagiti oversized a baboy nga aggapu manipud kadagiti sabali a probinsia, kas iti Pangasinan ken Bulacan.

Maibilang nga oversized ti baboy no agdagsenen iti nasursurok ngem 100 kilos.#

Comments are closed.