Footer

2 natay, 20 a tattao ti nadunor iti nagsisina nga aksidente ti lugan

CANDON CITY – Dakes a tiempo ken nagalis a kalsada ti kangrunaan a nakagapu iti nagsisina nga aksidente a napasamak iti las-ud ti uppat nga aldaw iti tallo nga ili ken ditoy siudad a nakatayan ti dua ken nakadunoran iti nasurok a 20 a tattao.

Idi agarup 5:10 ti agsapa ti Hunio 16, sangapulo ket siam a tattao a naglugan iti Hyundai Starex van ken Nissan Urban van ti nadundunor gapu iti panangdungpar ti naud-udi iti immuna iti maar-aramid a kalsada iti Barangay Imus, Santiago, Ilocos Sur.

Kimmaro ti trapiko ditoy a paset gapu iti kinadakes ti dalan a pinarnuay ti masansan a panagtudona.

Mapapati a saan a nakita ti drayber ti Nissan Urban van  ti Starex van  nga agur-uray iti batangna nga agdaliasat iti maar-aramid a kalsada iti nasao a barangay ket dinungparna daytoy.

Nupay awan ti naireport a nakaro a nasugatan kadagiti 19 a naglugan iti dua a sasakayan, nakaro ti dadael dagitoy.

Iti agarup alas 8:40 ti rabii daytoy met laeng a petsa, natay ti maysa a motorista gapu iti mapapati a pannakidinnungparna iti maysa a bus iti mapalpalawa a kalsada a sakup ti Barangay Labut Norte, Santa, Ilocos Sur.

Sigida a natay ni Ronie Rabilas y Gray, 36, naasawaan, ken residente iti Barangay Sidaoen, Sta. Cruz, Ilocos Sur, gapu iti sugatna iti ulo, maigapu iti panagdinnungpar ti maris berde a motorsiklona a Raine MGX iti Partas bus a minaneho ni Joselito Rabaca y Redoble, 53, naasawaan, ken residente iti Poblacion, Sta. Catalina, Ilocos Sur.

Segun iti inbestigasion, agpaamianan a direksion ti motorsiklo a minaneho ni Rabilas ket iti nadakamat a lugar, linisianna ti signboard iti liniana ngem mapapati a nakakaut iti linia ti makasabatna a bus a puon ti nagdinnungparanda ken dagus a nakatayanna.

Kabayatanna, kinagalis ti kalsada ti maitudtudo a nakagapu ti panagdinnungpar ti maysa a motorsiklo ken traysikel iti national highway a sakup ti Barangay Bonifacio, Cabugao, Ilocos Sur idi agarud 6:25 ti Hunio 18.

Agpada a naiyospital dagiti drayber a nainaganan a ni Ramil Retamal y Cobangbang, 20, baro, tricycle driver, ken residente iti Barangay Turod Patac, Cabugao, Ilocos Sur; ni Reymund Suboc y Ramos, 19, baro, awanan iti lisensia, ken residente iti Sitio Labut, Barangay Lipit, iti met laeng Cabugao; ken ti pasahero ni Ramil a nabigbig a ni Vincent Retamal y Cobangbang, 16, baro, ken residente met laeng iti Barangay Turod Patac,.

Naammuan iti report a mapapati a napardas ti panagpataray nga agpaabagatan ni Suboc a nagmaneho iti Honda Beat scooter ket gapu iti kinagalis ti dalan, aksidente a nadungparna ti Honda VMX tricycle a minaneho ni Retamal.

Naitaray ni Subok iti Pira Hospital iti Cabugao idinto a naipan iti Suero General Hospital dagiti dua a Retamal.

Nakaro ti dadael ti sungo ti motorsiklo idinto a nadadael met ti flasher ken headlight ti traysikel.

Iti sabali a damag, naideklara nga awanen ti biagna iti Saint Martin De Porres a nakaitarayanna ni Thelma Llanes y Dulay, 56, naasawaan, ken residente iti Barangay San Isidro, Candon City gapu iti pannakaikras ti naglugananda a Rusi motorcycle iti beach road iti Barangay Darapidap, Candon City idi agarup 7:50 ti rabii ti Hunio 19.

Mapapati a naatalan ni Benhur Llanes y Guerrero, 65, asawa ti biktima, ti maysa a sanga ti Gmelina a mapapati a naspak ken naibalangan iti dalanda a puon ti nakatulidan ti motorsikloda.

Awan ti aruat a helmet dagiti agassawa idi mapasamak ti aksidente.#

Comments are closed.