Footer

Drug pusher, nanabtuog iti operasion dagiti polis

CANDON CITY – Nakakumpiska dagiti nagtitipon a police elements iti bag a naglaon iti mapapati a droga iti insayangkatda nga operasion maikontra iti maysa a masuspetsa nga aglaklako iti marihuana iti Barangay Ayudante ditoy siudad idi aldaw ti Hunio 20.

Inaresto dagiti operatiba ti PDEA-Ilocos Sur, Police Regional Office ken ti PNP Candon City ni Nestor Garnachea y Diwawen,  naasawaan, mannalon, ken residente iti Barangay Baybayading, Salcedo, Ilocos Sur, kalpasan a nakasamsamda iti ikut daytoy iti maysa a plastic bag a naglaon iti  napagango a marihuana nga agdagsen iti 17.4 grams a mapattapatta nga agbalor iti P975.00.

Nabayagen a sinipsiputan dagiti polis ti suspek gapu iti mapapati a panaglakona iti marihuana.

Dimteng ti gundawayda a mangiwayat iti operasion idi nakaawatda iti impormasion a maysa nga agnagan iti Nestor ti agbirbirok iti gumatang iti marihuana ket mapasamak ti ginnatangan iti waiting shed iti igid ti national highway a sakup ti Barangay Ayudante.

Nagpuesto dagiti polis iti asideg ti pakapasamakan iti transaksion.

Di mabayag, dimteng ti suspek ket impakitana ti lakona kadagiti nagpammarang a buyer ket ditoyen a nagkuti dagiti polis  a nangkumpiska iti lako ti suspek sada inaresto.

Iti pannakaisurat daytoy, adda iti kustodia ti PNP Candon City ti suspek idinto a maisagsagana ti kaso a panaglabsing iti RA  9165 maikontra kenkuana.#