Footer

Ex-convict, nasarakan a tumtumpaw iti karayan

CAOAYAN, Ilocos Sur – Biktima iti salvage wenno panagibales ti motibo ti pannakapapatay ti maysa nga ex-convict a nasarakan ti bangkayna nga agtatapaw iti Karayan Mestizo idi malem ti Hunio 19?

Daytoy ti kitkitaen dagiti polis nga anggulo iti pannakapapatay ni Romualdo Quias y Ponce, 43, naasawaan ken residente iti Barangay Fuerte ditoy nga ili.

Nadakamat iti report a maysa nga ex-convict ni Quias ngem saan a nailanad no ania ti kaso a puon ti nakaibaludanna.

Segun ken ni Police Senior Inspector Edmar Quiton, hepe ti polis ditoy nga ili, nakaawatda iti report a nasarakan ti maysa a mangngalap a nabigbig a maysa a Robert Ritarita y Rabena, 40, naasawaan, ken residente met laeng iti nadakamat a barangay, ti bangkay ni Quias nga agtatapaw iti asideg ti nangipakatanna iti iketna.

Dinagdagus ni Ritarita nga impakaammo ti naduktalanna kadagiti barangay officials ket dagus met nga impakaammo dagitoy iti polis.

Iti inisial a panagimbestiga dagiti polis, naammuan a nagsagaba ni Quias iti nasurok a 15 a sugat iti ulo ken nadumaduma a paset ti bagina a mapapati a gapuanan ti paltog.

Di pay ammo no ania ti motibo ti pammapatay ngem kitkitaen dagiti inbestigador no napapatay ti biktima iti sabali a lugar sa naipuruak iti karayan.

Iti pannakaisurat daytoy, adda pay la ti bangkay iti Holy Angel Funeral Homes para iti pannakaautopsiana tapno maammuan no ania a kalibre ti paltog a naaramat.#