Footer

Motorsiklo ti tanod, narekobre

SINAIT, Ilocos Sur – Mapapati a nagang-angawan laeng nga intaray dagiti di nabigbig a tattao ti motorsiklo ti maysa a barangay tanod idi rabii ti Hunio 18 sada met la pinanawan kalpasanna.

Nagreport ni Joel Arrocena y Rosete, 40, naasawaan, barangay tanod, ken residente iti Barangay Barikir, a natakaw ti nangisit a motorsiklona a Kawasaki Fury nga imparkingna iti asideg ti tiendaan ditoy nga ili idi agarup 8:45 ti rabii ti nadakamat nga aldaw.

Nagsawar dagiti polis ken nakikoordinar kadagiti registrado a BIN ti police station ngem dida nasarakan ti lugan.

Nupay kasta, idi agarup 6:50 ti kabigatanna, nakaawat ti polis iti tawag manipud iti BIN iti Barangay Sabangan a nakitada ti nasao a lugan a naabandona iti kabakiran a paset ti barangay.

Naipaima ti nasao a motorsiklo iti akinkukua kalpasan nga impakitana dagiti dokumento ti panagtagikuana iti lugan.#