Footer

Nabileg ti daniw a therapy iti kalamidad

Ni  Jaime M. Agpalo, Jr.

(Tuloyna)

Addan nasurok nga uppat a gasut a dandaniw a nagpasapasa (circulate) kadagiti umili iti Fukushima Prefecture babaen ti iPad ken iPhone. Immabuten iti ginasgasut a ribu a downloads ket agtultuloy pay nga umadu.

Limtaw manen dagitoy a dandaniw kalpasan ti kalamidad ta imbilangda a napigsa a therapy iti linak-amda a delubio. Ti daniw a nabileg a therapy iti kalamidad, kas insurat ni John Lundberg iti The Blog.

Nakatulong dagiti dandaniw a namaglunit iti sugat a linak-amda gapu iti nakaam-ames a didigra. Ninayonanda pay ti bilang dagitoy a dandaniw a nangiyebkasanda iti marikriknada.

Inyikkis ni six grader Terumi Sekine iti daniwna: “Kayatko a maapresiar iti agdama nga awan ti nasipnget a napasamak iti napalabas…” (impatarusko babaen ti free translation.) Itoy a daniw ni Sekine, sitataliaw iti baro a biag ket ibatina laengen ti kalman a pakalaglagipan wenno historia ti napalabas.  Anian a panirigan, anian a daniw!

Indaniw met ti maysa nga ubing nga agtawen iti uppat:  “I love kindergarten. I love flowers. I love slides… I won’t give in to radiation.”

Iti baet ti kinaubingda, naawatanda a nasken a makipartisiparda babaen ti panangipadigoda met iti pinutarda a daniw. Banag a makapalukmeg iti puso.

Iti biang ni Rinatro Yamada, indaniwna ti kinabileg ti tao,  saan a bastabasta maibalat kadagiti agsasamusam a pannubok ti biag, ket kuna ti ubing iti daniwna: “Agtitinnulongtayo ta amin ket addaan pigsa nga agbiag…” (naipatarus babaen ti free translation).

No nakapsut ti pakinakemmo kalpasan ti didigra, napalalo no di pumigsa ken bumileg ti namnamam  kalpasan a nabasam daytoy a daniw ti ubing. Ta gutugotennaka a puminget ken mangusar iti talugadingmo a pigsa. No kabaelan ti ubing ti makidangdang a sipipinget, dimo kadi kabaelan a manakman? Dayta ti mensahe ti daniw ni Yamada!

Anian a kinabileg dagiti balikas iti dandaniw dagitoy nga ubbing!

Gapu iti kinalataken sadiay Japan dagitoy a dandaniw iti Fukushima, napanunot ti maysa nga estudiante sadiay Tokyo University, ni Chikako Kozawa, nga ipatarus dagitoy iti sangadosena a kangrunaan a lengguahe iti lubong tapno lalo pay a tuminggaw ti ikkisda nga umalut-ot iti sinagabada a saem ti delubio.

Nasuratda babaen ti English dagiti dandaniw ta English ngarud iti panagaramid iti apps iti iPad ken iPhone. Impatarus ni Kozawa babaen kadagiti kangrunaan a lengguahe iti lubong tapno agallangogan ti timekda – nga isuda ket natibker ken addan iti positibo a panirigan.

Ket kunami, wow, iti naminsan pay, limtaw manen ti bileg ti daniw, kalpasan ti naulpit a sinagaba a bunga ti kalamidad.

Nabileg a therapy dagiti dandaniw?  Impamatmat ken impakitan dagiti umili iti Fukushima Prefecture, Japan ti sungbat. Ti kinapositibo a panagpampanunot ti mangibunga iti positibo a panagbalbaliw nga agturong iti kinaragsak, kinasalun-at ken kalmado a panagtigtignay. Daytoy ti mangwaya iti desdesen a dana nga agturong iti nakananama a balligi iti amin a situasion ken aksion kadagiti amin a panagem iti aniaman a panawen.

Pudno la unay a mararaem daytoy a talugading nga ik-ikutan dagiti Hapon. Rumbeng la unay a pagsarmingan tapno maragpat met ti tugot a nagtengda. Rumbeng ken umno la unay a pagwadan ti amin.  Ta nabileg dagiti balikas. Kadatayo a Kristiano, ammotayo met ti kinabileg ti balikas,  kas mabasa iti John 1:1 ti Nasantuan a Biblia (New International Version @1984): “In the beginning was the Word, and the Word was with God, and the Word was God.”

No nabileg dagiti balikas – nabileg met ti daniw a grupo dagiti balikas.#

Comments are closed.