Footer

Pacquiao inyendorsona ti Vigan City a maibutos iti New7Wonders Cities

VIGAN CITY – Sabali pay a prominente a personalidad ti nangiyendorso iti pannakaibutos daytoy a siudad a maysa kadagiti pito a wonder cities iti lubong.

Inyendorso ni boxing icon Congressman Manny Pacquiao a mairaman ti Vigan City a mabutosan  iti New7Wonders Cities.

Mismo a nagpaala iti retrato ni Pacquiao, kaduana da Gov. Luis “Chavit” Singson ken Vigan City Mayor Eva Marie S. Medina a nangiyendorso iti pannakaibutos ti Vigan City New7Wonders Cities.

Ni Pacquiao ti maysa kadagiti kangrunaan a sangaili ni Gov. Luis “Chavit” Singson iti panangselebrarna ti maika-71 a kasangayna idi Hunio 21.

Nangrugi ti nomination phase ti New7Wonders Cities idi Enero 7, 2012 agingga iti Marso 7, 2012 nga agdagup iti 1,200 a siudad iti 220 a nadumaduma a pagilian iti lubong a nakapilian ti Vigan City ken 6 pay a siudad ditoy pagilian.

Nangrugi ti qualification phase idi Marso 7 ket agpatingga inton Nobiembre 23, 2012 a pakapilian ti nasurok 300 a siudad, maysa a siudad iti tunggal pagilian ken pakairamanan ti kangatuan a 77 a nominado a siudad.

Manipud iti 300, mapilinto ti 28 a finalist candidates manipud Nobiembre 23 agingga iti Disiembre 6, 2012, ket mabingay dagitoy iti tallo a phases santo maiwaragawag dagiti New 7Wonders Cities inton Disiembre 7, 2013.

Indagadag ni Mayor Eva Marie S. Medina ti panangbutos saan laeng dagiti Biguenio no di pay amin a Filipino iti Vigan City a maysa kadagiti New 7Wonders Cities.#

Comments are closed.