Footer

Truck nagkarga 8 awanan dokumento a baboy, napasardeng iti police checkpoint

STA. LUCIA, Ilocos Sur – Sabali manen a truck a nagkarga kadagiti baboy a masuspetsa a nakapuslit iti quarantine iti Tagudin, Ilocos Sur ti naduktalan dagiti polis bayat ti panagtsekpointda ditoy idi parbangon ti Hunio 16.

Segun iti report a dimmanon iti Provincial Police Office, pinasardeng dagiti pannakabagi ti linteg nga agbambantay iti checkpoint iti sanguanan ti police station ditoy nga ili ti maysa nga Isuzu Elf truck, addaan iti license plate number XKD 327, para iti routine checkpoint ket naduktalanda a nagkarga daytoy iti walo a kapon a baboy.

Saan a nadakamat iti report no ania a lugar ti destinasion ti truck ken no asino ti akinkukua kadagiti baboy a masuspetsa a maiserrek a mailako iti Vigan City.

Idi sitaen dagiti polis, awan ti maipakita ti drayber ti truck a nainaganan Gerardo Aslor y Dela Cruz, 34, naasawaan, ken residente iti Barangay Capangpangan, Vigan City a dokumento mainaig iti pannakaibiahe dagiti nasao a baboy ken pammaneknek a limmasat iti inspeksion iti quarantine sadiay Barangay Bio, Tagudin.

Na-impound ti nasao a lugan bayat nga awan ti maipakita ni Aslor a maitutop a dokumento ti pannakaibiahe dagiti baboy.

Daytoy ti maikadua a gundaway nga adda masalamaan dagiti polis a naiserrek a baboy ditoy probinsia nga awan ti maitutop a dokumento ti pannakaibiaheda.

Idi Hunio 8, maysa a truck a nakailuganan dagiti baboy a masuspetsa a mailibas a mailako iti Sta. Catalina ti pinasardeng dagiti polis iti impasdekda a checkpoint.

Impan dagiti polis ti nasao a truck iti police station kalpasan a naduktalanda a naggapu dagiti sangapulo ket tallo a baboy nga agdagsen iti sumurok kumurang 2,500 kilos ken agbalorda amin iti P220,000.00 iti Rosario, La Union ket iti Buguias, Benguet ti nailanad a destinasion dagitoy.

Iti kallabes, nagreklamo dagiti agtartaraken iti baboy ken ni Gov. Luis “Chavit” Singson a dakkelen ti lugida gapu iti pannakaiserrek dagiti oversized a baboy iti Ilocos Sur manipud sabali a probinsia nga amang a nalaklaka no maikumpara iti presio ti baboy ditoy probinsia.

Kas pangsalaknib kadagiti agtartaraken iti baboy iti probinsia, nangipaulog ni  Gov. Luis “Chavit” Singson iti pammilin a mangiparit iti pannakaiserrek dagiti oversized a baboy nga aggapu manipud kadagiti sabali a probinsia, kas iti Pangasinan ken Bulacan.

Pinirmaan metten ti gobernador ti Implementing Rules and Regulations (IRR) a maipakat kadagiti maiserrek a baboy ditoy probinsia.

Maibilang nga oversized ti baboy no agdagsenen iti nasurok 100 kilos.#

Comments are closed.