Footer

4 mapukpukaw a mangngalap bimmassit namnama a sibibiagda pay

PANGASINAN – Ad-adda pay a bimmassit ti namnama a masarakan a sibibiag dagiti uppat a mapukpukaw a mangngalap a taga-Bolinao iti idadalan ti sabali pay a bagyo ken iti panangisardeng ti Philippine Coast Guard iti panagbirok kadakuada.

Saan pay a nabirokan da Fred Celino, 31; Arnold Garcia, 38;  Domy de los Santos, 38;  ken Amante Resonable, 30, agpapada a mangngalap manipud Bolinao, Pangasinan a naireport a mapukpukaw sipud pay idi Hunio 20 kalpasan a mapapati a dinungpar ti maysa a ganggannaet a behikulo ti “AXL John” a bangkada iti kabaybayan iti labes ti Bolinao idi Hunio 20.

Ad-addan a mapukpukawan iti namnama dagiti pamilia dagiti nadakamat a mangngalap gapu iti isasangpet iti pagilian ti Bagyo Dindo a nakaigapuan ti idadakes manen ti panawen a nanglapped iti panangisayangkat ti Philippine Coast Guard iti aerial search ken rescue operations iti kabaybayan, nangruna iti Ilocos Sur ken Ilocos Norte a mapapati a pagturongan ti koriente a nangguyod kadagiti mangngalap.

Uppat a kakadua dagiti mapukpukaw ti nasalamaan ken inalaw ti dua a mangngalap a taga-Barangay Puro, Magsingal, Ilocos Sur,  bayat nga agkatangkatang dagitoy iti kabaybayan idi tengnga ti aldaw ti Hunio 23.

Nainaganan dagiti naalaw a mangngalap a da Edimio Balmores y Sanches, 40, naasawaan, residente iti Barangay Luna, Bolinao; Herman Balmores y Casi, 51, naasawaan; ken Celino Damian y Velasquez, 32, naasawaan, agpada a residente iti Barangay Concordia, Bolinao; ken ni Christopher Carbonell, 32.

Pimmusay ni Carbonell bayat ti pannakatamingna iti Gabriela Silang General Hospital, Vigan City gapu iti  kinakapsutna.

Naggawid dagiti mangngalap kalpasan a nakaungarda iti kapsut ken bisinda.

Segun kadagiti mangngalap, timmapogda idi Hunio 18 ket idi addadan iti taaw, dinalapus ida dagiti dadakkel a dalluyon a nakapattogan ti luganda.

Kinunada a bayat ti panagpatawda,  dinungpar ti maysa a dakkel a behikulo ti bangkada idi malem ti Hunio 20.

Uppat a mangngalap ti naireport a natay gapu iti nasao nga insidente.

Segun iti inisial a report, maysa a Chinese vessel ti nangdungpar iti bangka dagiti mangngalap.

Ngem pinaglibakan ti Chinese Embassy ti nasao nga insidente idinto nga imbatadna nga awan ti naawatda a report mainaig iti nasao a pannungpar.

Ngem iti simmarsaruno a report, kinuna ti PCG a saan a Chinese vessel ti nangdungpar iti bangka dagiti mangngalap no di maysa a behikulo nga addaan marka a Hongkong.

Suspetsaen ti PCG a maysa a vessel a nakarehistro iti Hong Kong ti aksidente a nakadungpar iti bangka dagiti mangngalap.

Nupay kasta, kuna ti PCG a madama ti pannakaberipika no ania a behikulo ti posible a nagdaliasat iti daydiay a lugar iti aldaw a pannakadungpar ti bangka dagiti mangngalap.

Madama ti panagpalutpot ti gobierno Aquino mainaig iti nasao nga insidente idinto nga inkari ni Pres. Benigno Aquino III a tuntonenda ti hustisia para kadagiti natay iti nasao nga insidente.

Kabayatanna, sabali pay a mangngalap a taga-Bolinao, Pangasinan ti naalaw nga agkatangkatang iti kabaybayan a sakup ti Magsingal, Ilocos Sur idi agsapa ti Hunio 24.

Nabigbig ti naalaw a mangngalap a ni Jeffrey Nieva y Camba, 23, baro, ken residente iti Barangay Jerminal, Bolinao, Pangasinan.

Iti report ti polis, nasalamaan ni Randy Pagay, mangngalap a taga-Barangay Puro, ni Nieva nga agkatangkatang iti kabaybayan idi agarup alas 4:00 ti bigat ti Hunio 24.

Segun ken ni Nieva, nadadael ti makina ti bangkana bayat ti kaaddana iti taaw a nakaigapuan ti panagkatangkatangna.

Naipan ni Nieva iti Magsingal District Hospital para iti medical check-up sa naikustodia iti police station ken napakaammuan ti kabsatna a babai.

Saan a karaman ni Nieva iti immuna a grupo dagiti mangngalap a mapukpukaw pay laeng.#