Footer

Baro, napagbiddutan a mannanakaw

STO. DOMINGO, Ilocos Sur – Napagbiddutan ti maysa a baro a mannanakaw a puon ti nakakabkabilan ken nakayospitalanna itay lawasna.

Segun iti report, kasangsangpet ti anak ni Larry Ceria, ti akimbalay, manipud Manila ket nagdalus iti kuarto ngem naduktalanna laengen  nga aglemlemmeng ni Moises Talbo, 20, residente iti Barangay Borobor, ditoy nga ili iti sirok ti katre.

Ti laeng balasang a katulong a nainaganan laeng a Kristine ti agbambantay iti balay agsipud ta adda iti abroad ni Ceria.

Nagpaarayat ti anak ket mapapati a kinabil dagiti nagresponde a kaarruba ni Talbo.

Idi damo, naglibakan ti katulong nga adda relasionda ken ni Talbo ngem immamin met laeng idi agangay nga inayabanna ti nobiona ket addan tallo nga aldaw nga aggigian daytoy iti balay ti amona.

Nupay kasta, saanen a nagipila iti kaso ti amo ti balasang idi dimmawat daytoy iti pammakawan ken awan met napukaw iti balay.#

Comments are closed.