Footer

Mini dump truck, natnag iti rangkis; 1 natay, 10 nadundunor

BANTAY, Ilocos Sur – Malas ti Hunio 25 kadagitoy a trabahador ta natnag iti rangkis ti naglugananda a trak a puon ti nakatayan ti maysa a kaduada.

Iti report a dimmanon iti Provincial Police Office ditoy, maysa a trabahador ti natay idinto a nasugatan ti sangapulo a kaduada idi natnag ti mini dump truck a naglugananda iti rangkis bayat ti panagdaliasatna iti provincial road a sakup ti Barangay Butir ti nadakamat nga ili idi agarup alas 9:00 ti bigat ti Hunio 25.

Naammuan iti inbestigasion nga agdaldaliasat nga agpadaya ti nasao a mini dump truck  ti MBB Construction idi napukaw ti drayber a ni Florentino Castillo y Dato, 30, naasawaan, ken residente iti Barangay Nagtupacan, ti kontrolna iti manibela ket nagpakannawan ti lugan sa naitapuak iti sangapulo kadapan ti kaunegna a rangkis.

Segun iti report, naikuyog a natnag iti lugan dagiti pasahero a trabahador agraman ti drayber a puon ti nakadundunoran ti sangapulo ket maysa kadakuada.

Naitaray iti Reyes Clinic and Hospital dagiti biktima a pakairamanan da Henry Bringas y Cabalce, 26, baro; Benjie Molina y Bajet, 21; Roger Advincula y Bringas, 23; Fortunato Cabudul y Bajet, 23; Christian Advincula y Tolentino, 15; Antonio de Leon y Passion, 32, agpapadada amin a residente iti Barangay Labut Norte, Santa, Ilocos Sur; Begel La Mano y Villano, 19; Romeo Doquilo y Dona, 19, agpada a residente iti Barangay Pacang, Sta. Maria, Ilocos Sur; Arjay Tamayo y Lagrimas, 16, residente iti Burgos, Ilocos Sur; Cesar Soberano y Sabado, 38, residente iti Barangay Busel-Busel, Santiago; ken Rommel Dumot y Monses, 16, residente iti Barangay Suso, Sta. Maria.

Naideklara nga awanen ti biag ni Doquilo idi maidanon iti ospital.

Segun iti maysa kadagiti biktima, traysikel ti mangitultulod kadakuada iti pagtrabahuanda ngem iti dayta nga aldaw, iti mini dump truck ti naglugananda.

Kabayatanna, boluntario a simmuko ti drayber iti police station ti Sta. Maria.#

 

Comments are closed.