Footer

BANNER: Biktima ti pammaltog, mistaken identity: Sinait COP

SINAIT, Ilocos Sur – Napagbiddutan dagiti tallo a biktima a pinaltogan dagiti armado a lallaki iti national highway sadiay Barangay Curtin ditoy nga ili idi rabii ti Hunio 29?

Kinuna ni Police Senior Inspector Arsenio Ramos, hepe ti polis ditoy nga ili, nga iti panagkitana, maysa a kaso ti mistaken identity ti nasao a pammaltog ket saan a dagiti biktima ti puntiria a paltogan dagiti armado a lallaki a riding in tandem iti dayta a rabii.

Mapapati nga agkabagbagi ni Jay Ar Sabugo y Guzman, maysa kadagiti biktima, iti maysa nga adda kasona iti pammapatay ken maipagarup a puntiria dagiti suspek a paltogan.

Kinuna ti hepe nga addan suspekda iti nasao a pammaltog ket nupay kinumpirmana a taga-Teppeng dagitoy, saanna pay nga impalgak ti naganda agingga iti saanda a makasuan dagitoy.

Kinuna ni Ramos nga adda dagitoy iti watch list agsipud ta adda di kumpirmado a report a nainbolbar ti grupoda iti droga ken gun for hire iti napalabas.

Segun iti inisial nga inbestigasion dagiti polis, agpaamianan a direksion ti motorsiklo a Honda TMX a minaneho ni Sabugo, 23, baro, mannalon, ken residente iti Barangay Magsaysay, kalubbonna da  Rudymar Villegas T. Tugade, 15, out of school youth, ken residente met laeng iti nadakamat a barangay ken ni Jenerey Braceros y Ibaan, 19, baro, mannalon ken residente iti Barangay Sallacapo, Sinait ket idi makagtengda iti nadakamat a lugar, kellaat nga immasideg ti motorsiklo a nagluganan ti dua a lallaki ket pinaltogan ida ti back rider.

Nagsagrap ni Sabugo iti sugat iti makannigid nga abagana ken iti likudna idinto a nasugatan ti agsumbangir a takiag ken makannigid a tumeng ni Braceros.

Saan a naan-ano ni Villegas a nakatugaw iti nagbaetan dagiti dua.

Naglibas dagiti suspek iti amianan a direksion kalpasan ti pammaltog.

Nupay nasugatan ni Sabugo, nabaelanna nga indanon ti lugan iti Sinait District Hospital. Naiyalisda kalpasanna iti Gabriela Silang General Hospital.

Awan ti narekobre dagiti nagresponde a polis a kapsula iti nakapasamakan ti krimen.

Iti pannakaisurat daytoy, isagsaganan ti polis ditoy nga ili nga ipila ti kaso maikontra kadagiti di pay nainaganan a suspek.#

Comments are closed.