Footer

Mannalon, nakoriente, natay

LAGANGILANG, Abra – Nakoriente ti maysa a mannalon bayat ti panagdalusna iti talon sadiay Barangay Aget ditoy nga ili idi alas 3:00 ti malem ti Hulio 3.

Saanen a naidanon a sibibiag pay ni Gerald Orilla y Agup, 46, ken agnaed iti nadakamat a barangay.

Segun ken ni PSI Eddie Bagto, hepe ti Lagangilang police station, tinangdanan ti kabagianda ni Orilla ken ni Floro Agup, 38, naasawaan, nga agdalus iti talon daytoy.

Kagudua ti aldaw laeng koma nga agdalus dagiti dua ngem nagtrabahoda agingga iti alas 3:00 ti malem.

Mapan koma ibelleng ni Orilla dagiti naparutda a ruot ngem naisab-it ti tengngedna iti barut ti koriente ket nadaleb a puon ti nakapandaganna iti live wire a nakagapu iti pannakakorientena.

Kinuna ni Agup a dagus a nagpaarayat kadagiti kaarrubada ngem idi maikkatda ti barut a napandagan ti biktima, awanen ti puotna.

Mapapati nga illegal a naikonektar ti linia ti koriente iti maysa a piggery a kukua ti maysa a Floricante Cortez manipud iti kontador ti maysa nga Arnel Ayunon.#

Comments are closed.