Footer

Tricycle driver, pinaltogan ti padana nga agpaspasada

TAGUDIN, Ilocos Sur – Riri iti napalabas ti mapapati a gapu ti nangpaltogan ti maysa a tricycle driver iti padana a tricycle driver  iti ruar ti maysa a panganan iti igid ti national highway iti Barangay Del Pilar, ditoy nga ili idi rabii ti Hulio 1.

Immuna a naipaagas ni Eufrosenio Cuaresma y Naprana, 42, ken residente iti Barangay Lacong ditoy nga ili iti Tagudin General Hospital and Capillariasis Center sa naiyalis iti maysa nga ospital iti San Fernando City.

Naammuan iti inbestigasion dagiti polis a sakbay ti insidente, naggiinom da Sapla, kaduana dagiti gagayyemna, iti Vj’s Videoke Refreshment idi simmangpet ni Cuaresma ngem iti ruar ti naginuman daytoy idi makitana ti suspek.

Immalis ni Cuaresma iti Mel’s Eatery idi madanon ti curfew hour ngem bayat ti kaaddana iti nasao a panganan, simmangpet ni Sapla a nakalugan iti traysikel.

Naaddaan dagiti dua iti nabara nga argumento ket mapapati a dinisnog ni Cuaresma ni Sapla ket binunot met ti naudi ti paltogna sana pinaltogan ti biktima iti namitlo a nakapuntaan iti likud ti makannigid a siketna.

Nasugatan met ti makannawan a ramay ni Ruel Orfiano, 21, baro, ken residente iti Barangay Patpata Centro, Balaoan, La Union a nakatugaw iti asideg ti nakapasamakan ti insidente.

Naglibas ti suspek kalpasan ti insidente, kuyogna ti paltogna idinto a naitaray met ni Cuaresma iti ospital.

Awan ti nasarakan dagiti nagresponde a polis a kapsula iti nakapasamakan ti pammaltog.

Madama ti inbestigasion mainaig iti nasao nga insidente.

Saan a naibaga iti report no ania ti nagsusikan dagiti dua iti kallabes.#

Comments are closed.