Footer

3 natiliw iti insayangkat ti polis nga Oplan Bakal

MAGSINGAL, Ilocos Sur – Tallo a lalaki ti natiliwan nga agikut iti armas bayat ti panagisayangkat dagiti polis iti Oplan Bokal kadagiti paginuman iti uneg ti ili ditoy idi rabii ti Hulio 11.

Segun iti report manipud iti polis ditoy, bayat ti panagisayangkatda  iti panagkapkap iti armas kadagiti paginuman ken videoke bars idi agarup alas 11:00 ti rabii ti nadakamat nga aldaw, nasalamaanda iti Love Story Videoke Bar iti Barangay Panay Norte dagiti tallo a lalaki a suspetsoso ti garawda.

Nabigbig dagitoy a da Arnell Manguiat y Tacsiat, 30, naasawaan, tricycle driver, Noli Tacsiat y Tactay, 17, baro; ken Filimeno Ramos Y Tabbal, 59, baro, mannalon, agar-aramid iti uging; agpapada amin a residente iti Barangay Lao-ingen, Sto. Domingo, Ilocos Sur.

Kinapkapan dagiti polis dagiti suspek sada pinaluktan ti compartment ti motorsikloda  ket natakuatanda ti maysa a homemade pistolized GA12 shotgun ken maysa a homemade cal. 5.56 pistol (one pong), agpada nga awanan iti marka ken serial number.

Naipan dagiti tallo a suspek iti police station agraman dagiti nakumpiska iti ikutda a paltog.

Nasapsapa ngem daytoy, inaresto dagiti polis ti dua a baro kalpasan a nakasamsamda ti maysa a paltog iti ikut ti maysa kadakuada.

Nagturong dagiti polis iti Magsingal public market kalpasan a nakaawatda iti pulong manipud iti maysa nga Esen Arellano a pinaturongan ida ti maysa a lalaki iti paltog bayat ti kaaddada nga aggagayyem iti Moicon’s Empanada idi agarup 9:30 iti dayta met laeng a rabii.

Inasitgan dagiti polis da Christopher Tica y Tamag, 26, mannalon, ken Ariston Fagela y Giron, 28, mannalon, agpada a residente iti Barangay Labut, Magsingal ket idi kinapkapanda dagiti dua, nakakumpiskada iti ikut ni Tica iti maysa a cal. 38 nga Squiresbingham a nagkarga iti innem a bala.

Iti pannakaisurat daytoy, naipatuloden ti kaso a panaglabsing iti RA 8294 maikontra ken ni Tica.#

Comments are closed.