Footer

912 indigent a pamilia, naiyendorso a mairaman iti 4Ps

VIGAN CITY – Inaprobaran ti sangguniang panlungsod ditoy ti maysa a resolusion a mangkiddaw iti DWSD ti pannakairaman dagiti nabatbati nga indigent a pamilia ditoy siudad iti Pantawid Pamilyang Pilipino Program (4 Ps).

Insigida nga inaprobaran ti konseho ti siudad ti resolusion nga indatag ni Konsehal Loreto Quibilan a mangkidkiddaw ken ni DSWD Secretary Dinky Soliman ti pannakairaman ti 912 nga indigent a pamilia ti Vigan City a mainayon a benepisario ti 4Ps.

Kinuna ni Quibilan nga inyendorsona ti nasao a resolusion tapno mairaman iti programa dagiti nabatbati pay a pamilia ditoy siudad a saan a benepisario iti 4Ps gapu ta dakkel ti maitulongna iti panagbiagda.

Iti babaen ti 4Ps, umawat dagiti benepisario iti health cash grant a P500 ken educational cash grant a sag-P300 dagiti tallo nga annakda ngem kasapulan a surotenda dagiti kondision kas iti panagatendarda iti family development sessions, panagbasa dagiti annakda ken dadduma pay a pakaseknan iti salun-at.#