Footer

Mannalon, nakasuan iti panaglabsing iti RA 9165

TAGUDIN, Ilocos Sur –  Nakasuan iti panaglabsing iti RA 9165 ti maysa a mannalon kalpasan a nakasukain dagiti polis iti marihuana iti uneg ti luganna idi malem ti Hulio 7.

Nakapupok iti police station ditoy ni Bobby Montes y Mateo, 33, naasawaan, mannalon, ken residente iti Barangay Sasaba, Santol, La Union, kalpasan nga inwaksina ti kalinteganna iti babaen ti Article 125 ti Revised Penal Code kabayatan ti pannakakumpleto ti preliminary investigation proceedings maikontra kenkuana ken yaannugotna nga agtalinaed iti pagbaludan.

Idi agarup alas una ti malem ti Hulio 7, nangipasdek dagiti polis ti Alilem babaen ti koordinasion ti PDEA RO 1 iti checkpoint iti Sitio Macdaar, Barangay Poblacion kalpasan a nakaawatda iti report a lumasat iti nadakamat a lugar ti maysa a lugan a masuspetsa a nagkarga iti marihuana.

Idi agarup alas 2:15 ti malem, napasungadan dagiti polis ti asul a Mitsubishi Lancer Model 97 a minaneho ni Montes ket pinasardengda daytoy iti checkpoint para iti inspeksion.

Nakasukain dagiti polis iti trunk ti lugan iti maysa a pakete a naparautan iti tape a naglaon iti napagango a marihuana nga agdagsen iti sumurok kumurang a 2.5 kilos.

Segun iti polis, nakalista ni Montes iti Order of Battle Drug Watch List ti La Union.#

Comments are closed.