Footer

Agsangit met uray naranggas a leon

Sarita ni Mancielito S. Tacadena

(Umuna a paset)

 

 

Inirutam, Leon, ti dalikepkepmo iti laksid a pamuskolen ti suotmo a diaket. Iti panagbayagmo iti uneg ti de aircon a bus lalo met a kumutukot ti lam-ek iti amin a paset ti bagim. Wen, addaka ita iti dalan nga agturong sadiay Manila tapno sabtem ni Nala nga asawam. Innem la a bulan ti napalabas sipud idi intulodmo a nagsubli sadiay Singapore a pagpapaayanna kas katulongan ti maysa a pamilia ngem adtoy nga agsubli manen. Dua a tawen ti ekstension ti kontratana ngem iti umuna a gundaway saanna a naturpos ti kontratana. Nasuroken a sangapulo ket dua a tawen ni Nala kas domestic helper sadiay Singapore. Baron ni Phillip Rey nga agsursuro pay la a magna idi mabati kenka.

Timman-awka iti tawa ket naisalat ti panagkitam iti grupo dagiti lallaki nga agiinum iti sirok ti poste ti koriente. Nalabesen a tengnga ti rabii ket madlaw a nassayyengen dagitoy iti kaadu ti nainumda. Nabati daytoy a buya iti panunotmo ket nangrugi nga agampayag ti isipmo kadagiti pasamak iti biagmo bayat ti kaawan ni baketmo iti dennayo nga agama. Nagsublika iti daydi panawen a panagpakadana kenka tapno agtrabaho iti ballasiw-taaw.

“Tallonton ti tawen ni PR, sika. Leon. Ania ti planom?” inkalbit ni Nala kenka bayat ti panagkaatagyo iti maysa a rabii.

“Ket padakkelen a,” aleng-aleng laeng ti sungbatmo.

“Agpadata nga awan pagsapulanna lakay. Awan met ganganabem iti kinapotograpom,” kinuna manen ti asawam.

“Ania nga awan,” inyingarmo. Kasla napitik ti lapayagmo iti kinuna ti asawam. “Saan kadi a dagiti premiok ti paggapgapuan ti ipakpakanko kadakayo? Makitam dagiti tropeo a nakaplastar dita salas? Saan kadi a pammaneknek dagita a ballaigi ti napilik a tay-ak?”

“Ala wen, ngem agingga iti kaano a kastoytayo lattan, Leon? Mamin-ano kadi iti makatawen dagita a pasalip? Mano kadi ti premiom tunggal mangabakka? Makaanay kadin dayta kenka?” medio ngimmato metten ti timek ni Nala.

“Ket ania ti kayatmo a sawen? Isardengkon ti kinapotograpok?” imperkakmo ket giddato ti ibabangonmo.

“Ammok a saanmo a masardengan dayta, Leon, isu a siakon ti agaramid iti pamuspusan. Agabroadak. Nakasaritakon ni Insan Emmang a naggapu sadiay Singapore. Tulongannak a mangiproseso kadagiti papeles a kasapulak. Bareng makapaggiddankaminton iti panagsublina,” impalgak ti asawam.

Dayta ti rugi ti panagsublisubli ni Nala sadiay Singapore. Nagtalinaedka met iti kinapotograpom ngem iti kaawanna iti dennam nakariknaka iti pannakaila. Ar-arapaapem ti kaadda koma ni Nala a kaiddam iti rabii. Ket idi saanmon a madaeran pay, rinugiam ti agsapul iti ragsak nga ipaay ti sabali. Imbes nga urnongem dagiti ipawpaw-itna kenka, napan amin kadagiti bisiom. Ad-adda pay ketdin nga iti balay ti katugangam ti pagnaedan ni Phillip Rey gapu ta inaldaw met ti iruruarmo. Pinadasdaka a bagbagaan dagiti nakaikamangam ngem nagbalinkan a tuleng.  Mayarigkan iti maysa a malalaki a Leon a ti babai ti para sapul iti kanen ti pamilia idinto nga agmalmalem a nakauyad ti lalaki a ti la kasla gurruod a timekna ti pangkigkigtotna kadagiti agpanggep nga umasideg iti teritoriona.

Idi agangay, napanunotmo ti mangipatakder iti bassit a computer café iti abay ti balayyo. Siempre, dimmawatka iti kuarta iti asawam a sidadaras met a nangipaw-it gapu iti pammatina a napintas ti pagbanagan daytoy. Ngem nupay adda met latta dagiti ubbing nga umay agay-ayam ken estudiante nga umay agsukisok usar ti internet, kagiddan met dayta ti pannakasumokmo iti social net working. Agmalmalem a naka-onlineka ket ti la aglike, agcomment ken agiposte ti inub-ubram. Dita a naam-ammom ti maysa a balasang a taga-kabangibang a probinsia. Ket gapu ngarud ta awan ni Nala, inaremmo. Inay-ayom. Insagsagutam iti adu a ladawan a maalam kadagiti nadumaduma a lugar a nakaisar-ongam. Ngem saanmo a naparukma gapu ta addan kaayan-ayatna a kapatadana.

(Maigibusto)