Footer

3 natay, panagdinnungpar bus, traysikel

NARVACAN, Ilocos Sur – Tallo ti natay idi nagdinnungpar ti maysa a bus ken traysikel iti national highway a paset ti Sitio Limmansangan, Barangay Margaay, ditoy nga ili idi lawasna.

Nabigbig dagiti biktima a da Apolinario Aquino Jr., drayber ti traysikel, ken dagiti pasaherona nga aggasawa a David ken Herminia Dasalla, agpada a residente iti Barangay Camarao ditoy met laeng nga ili.

Segun iti panagimbestiga ti polis, mapapati a kimmaut ti traysikel iti linia ti Florida Bus a minaneho ni Elmer Ventura Espaniol, 48, residente iti Villaca, Batac City, Ilocos Norte a nakagapu iti head-on collision.

Gapu iti kapigsa ti dinnungpar, naisina ti sidecar ti traysikel ket insurot ti bus daytoy iti agarup duapulo a metro.

Napilaan ni Ventura iti reckless imprudence resulting to multiple homicide and damage to property ket temporario a nawayawayaan kalpasan a nagpiansa iti P30,000.00.#

Comments are closed.