Footer

BANNER NEWS: Kinatsek-in ti napapatay iti resort house, birbiroken dagiti polis

TAGUDIN, Ilocos Sur -Madama ti panangbirok dagiti polis iti lalaki a kadua ti napapatay a babai a nagtsek-in iti maysa a beach resort house iti Barangay Dardarat ditoy nga ili idi Hulio 22.

Ibilang dagiti polis a kangrunaan a suspek ti lalaki iti pannakapapatay ni Sheila Maynes Monte iti maysa a kuarto ti Seaside Bar Resort.

Inladawan ni Police Inspector Napoleon Gao-ay, hepe ti polis ditoy, ti suspek nga agtayag iti 5’5” agingga iti 5’6,” slender ti pammagina, naka-bull cap, ken naka-shades.

Kinuna ni Gao-ay a nagtsek-in iti beach resort ti di pay nabigbig a lalaki ken ni Monte, 29, separada, ken residente iti Barangay Paratong, Bangar, La Union  idi 1:15  ti malem ti Hulio 21 ket naited kadakuada ti Room 10.

Nupay kasta, saan a nagrehistro dagiti dua ta segun ken ni Evelyn Barroga, agpapaay iti nasao a beach resort, awan ti record book a pagrehistroanda agsipud ta kas kapaliiwanda, dinto met la isurat dagiti nagtsek-in ti pudpudno a nagan ken residensiada.

Nasarakan ni Barroga a natayen ni Monte iti uneg ti inupaanda a kuarto idi agarup 7:45 ti agsapa ti Hulio 22 idi mapanna ipakaammo kadagiti nagtsek-in a naglabesen ti oras a panangrentada iti kuartoda.

Kinuna ni Barroga nga idi alas 5:00 ti malem, inyatiddog ti lalaki ti panaggianda iti kuarto agingga iti ala una ti parbangon ket nagbayad iti P100.

Nupay kasta, di nasiputan ni Barroga no nagsubli daytoy iti kuarto wenno pimmanaw kalpasan ti panagbayadna.

Nadakamatna ketdi a nagsaludsod ti lalaki no sadino ti paggatangan iti pangrabii.

Kasta met nga imbaga dagiti agpapaay iti beach resort nga awan ti nadlawda a kanabtuog iti kuarto agsipud ta nairana nga adda naangay a party iti dayta a malem.

Nagsagrap ni Monte iti sugat iti ulo a mapapati a gapuanan ti natangken a banag ken naglitem ti nadumaduma a paset ti ulona.

Kinuna ni Gao-ay a nabigbig ti biktima babaen ti maysa a kaarrubana.

Kinunana nga awan ti nakitada a pakaammuan ti kinasiasino ti biktima ta awan ti petakana. Nakasukainda ketdi iti P200 iti bulsa ti biktima.

Nakasarakak dagiti inbestigador iti barikes ken maysa a botelia  iti asideg ti crime scene. Sabali laeng ti payong a maroon a namarkaan iti Perlita Grace Javier.

Kas maibatay iti autopsia a naipakat iti biktima, nabekkel ti biktima babaen ti sinturon ken napang-or babaen ti botelia.

Innayon ti hepe a naammuanda a text mate ti biktima ti suspek ket daytoy ti  sursurotenda nga anggulo.#

Comments are closed.