Footer

DOLE rinugianna nagpasueldo kadagiti benepisario ti SPES

VIGAN CITY – Rinugian ti Department of Labor and Employment itay Hulio 30 ti nagiwaras kadagiti tseke a bayad iti panagtrabaho dagiti estudiante iti babaen ti Special Program for Employment of Students.

Segun ken ni DOLE Ilocos Sur Field Officer Fresnaida Gundan, mangikuyog laeng dagiti estudiante iti ID no panda alaen ti tsekeda iti opisinada ditoy siudad, ket no ti nagannak wenno ti kabsatna ti mapan mangala, kasapulan ti otorisasion manipud iti estudiante.

Tinawen nga ipapaay ti DOLE ti SPES a panagtrabaho dagiti benepisario manipud Abril agingga iti Mayo tapno makateggedda iti pagbasada babaen ti pannakikammayet dagiti pribado a kumpania ken ahensia ti gobierno.

Innem a pulo a porsiente iti sueldo wenno teggeden ti estudiante ti ibaklay ti employer idinto a 40 porsiento ti ibaklay ti DoLE.

Inyussuat daydi Presidente Corazon C. Aquino ti SPES kalpasan nga impasa ti Kongreso ti RA 7323 idi 1992.

Limmawa ti sakupen ti nasao a programa babaen ti RA 9547 a naiyimplementar idi 2009 a nangamendar iti RA 7323.

Kinuna ni Gundan a nataktak ti pannakaited dagiti tseke dagiti nagtrabaho nga estudiante agsipud ta adda dagiti local government unit ken estudiante a saan a kumpleto dagiti indatagda a papers a kasapulan iti pannakaproseso ti tsekeda.

Kinuna ni Gundan a no kayat ti estudiante ti agtrabaho iti babaen ti SPES, mapan laeng agimpormar iti opisinada wenno kadagiti PESO managers ta dagitoy ti kabuligda a mangiyimplementar iti nasao a programa.

Kasapulan a mapataran ti aplikante dagiti sumaganad: masapul nga agtawen iti 18 ngem saan a lumbes ti tawenna iti 25; saan a lumbes ti nagtipon a net income ti nagannak kenkuana iti kaudian nga annual poverty threshold level para iti pamilia nga agdagup iti innem kas intuding ti National Economic Development Authority kalpasan ti panagbuisda  ken nakagun-od iti average passing grade iti naudi a semestre a panagbasana.

Kinuna ni Gundan a mangnamnama a makatulong iti dakkel ti awaten dagiti estudiante a tseke iti panagbasada.#

Comments are closed.