Footer

Naitawtaw nga agama a mangngalap, naalaw

SAN ESTEBAN, Ilocos Sur –  Iti Luna, La Union ti nakaitawtawan dagiti agama a naireport a mapukpukaw, daytoy ti report a dimmanon iti kapolisan ditoy idi malem ti Hulio 31.

Nupay madlaw nga agkakapsutda gapu iti maysa nga aldaw a panagkatangkatangda iti taaw, natalged ti kasasaadda iti detachment ti coast guard iti Barangay Darigayos, La Union dagiti agama nga Edgardo Barrey, 42, ken Jerrick Barrey, 17, residente iti Barangay Apatot, San Esteban .

Nakikoordinar da COP Police Inspector Joel Castillo, Konsehal Marvin Ong ken ni Barangay Captain Nestor Elegio iti Luna police station sada napan inyawid dagiti dua.

Naitarus dagitoy iti Tagudin General Hospital tapno agpaungarda sakbay ti panagawidda iti barangayda.

Timmapog iti baybay iti alas dos ti parbangon ti Hulio 30 dagiti agama, kaduada dagiti dadduma a kalugaranda, ngem  saanda a simmangpet idinto a timmakdangen amin dagiti kaduada.

Segun iti kabsat ni Edgardo, pinanawanna dagiti agama iti maysa a rama sana napan kinita ti sabali pay a rama ket idi nagsubli, awanen dagitoy.

Uray dagiti kaduada a mangngalap, dida ammo ti nagturongan dagiti agama.

Segun ken ni Edgardo, naawananda iti gasolina bayat ti kaaddada iti taaw ket inyagus ida ti napigsa a dalluyon ken napigsa nga angin agingga iti paset ti Barangay Darigayos, Luna, La Union a nakaalawan ida da Rogelio Ancheta ken Vicente Alcaria, mangngalap a taga-Darigayos..

Kinuna ni Edgardo a naibbus ti kanen ken inumenda ngem ingkagumaanda latta ti naggaud nga agpaigid ngem dida ammo ti yanda agsipud ta awan ti pamalpalatpatanda iti direksionda.

Kinuna met ti asawa ni Edgardo a natalna met ti baybay ken awan ti signal nga adda bagyo isu nga adu ti timmapog a kalugaranda a mangngalap a pakairamanan ti agama.#

Comments are closed.