Footer

SIDEBAR: Vigan City massacre, ania ti naun-uneg a ramutna?

Tawid News Team

 

VIGAN CITY – Produkto ti awanan simbeng a panunot ti napasamak a masaker iti Barangay 2 (Amianance) idi parbangon ti Agosto 2?

Dayta ti saludsod nga adda iti panunot dagiti umili daytoy naulimek a siudad nga ita laeng a pakapasamakan ti kastoy kadamsak nga aramid.

Idi agarup 1:25 ti parbangon ti Agosto 2, mapapati a nagsasaruno a pinaltogan ni Edwin Espinueva y de Vera, 37,  dagiti kameng ti pamiliana a pakairamanan ti asawana a ni  Francess Ruela Espinueva, 34; ti anakna a ni Carla Espinueva, 16; Estrelita Mendoza, 56, katuganganna a babai; ken Jeffrey Mendoza, 30, kayongna.

Natay ni Samantha, 7, sabali pay nga anak ti suspek, iti ospital a nakaitarayanna.

Nakalasat iti masaker ti katugangan ti suspek a ni Jerry Mendoza y Sumang, 61, ken ti sabali pay a kayongna a ni Julius Niñaga y Mendoza, 34, gapu ta nagkumegda iti kuartoda bayat ti panangpaltog ti suspek kadagiti kameng ti pamiliana.

Iti panagimbestiga dagiti polis, limtuad a nagringgor da Jeffrey ken ti suspek agsipud ta mapapati nga impalgak daytoy ken ni Francess, asawa ti suspek, nga adda sabali a babai iti biag ti suspek.

Daytoy ti mapapati a ramut ti saan a panagkinnaawatan ti suspek ken ti asawana a nagtungpal iti panagringgorda ken ni Jeffrey.

Nailanad iti report ti provincial police office iti police regional office ti panagpirma iti sworn statements da Jerry ken Julius a nagriri da Jeffrey ken ti suspek gapu iti panangipalgak ni Jeffrey ken ni Francess ti kaadda iti “illicit affair” ti kayongna iti sabali a babai a puon ti panagringgorda nga aggasawa ken mapapati a panangkabkabil ti lalaki iti asawana.

Iti interbio ni Jun Ramos ken ni Tata Jerry iti programa daytoy a Barangay Commando Brigada a naipatangatang iti DWRS, kinuna ti lakay a kinapatangna da Edwin ken Jeffrey tapno agkappiada.  Segun pay iti lakay, ti ammona ket naurnosnan dagitoy.

Iti met laeng interbio ni Jun Ramos ken ni Tata Jerry, nadakamatna nga awan ti nakitkitana a paltog ti manugangna. Posible a ginatang ni Edwin ti paltog kalpasan ti panagririda nga agkayong.

Pangaramatanna iti paltog?  Pangsalaknibna iti bagina?

Wenno adda idin sumipsiplot iti panunotna a sabali a pangaramatanna iti paltog?

Kangrunaan a tulbek no ania ti sungbat iti maudi a saludsod ti panangretrato ti suspek iti bagina nga adda iggemna a kuaderno a nakailanadan ti maysa a mapapati a suicide note: “Mama weng sam and karla mahal na mahal ko kayo kaya ko nagawa ito…ayaw kong magkahiwahiwalay tayo …happy 15th year to my loving wife frances louella m espinueva i love you fram papa bong.”

No kaano a rinetrato ti suspek ti bagina a nakaiggem iti kuaderno a nakailanadan ti suicide note ti saanton a maibaga. Ngem mapapati a panggep ti suspek nga ibati ti nasao a retrato a kas pammaneknek iti kayatna nga isayangkat.

Nagkadua ti ipasimudaag ti suicide note.

Ladawan kadi daytoy ti maysa a napukawen ti simbeng ti panunotna ket dinan ammo ti ar-aramidenna? Wenno ladawan ti maysa a lalaki a napukawen ti namnamana a mapasublina pay ti kinatalingenngen ti pagtaenganda, nangruna ti pammateg ken panagtalek ti asawa ken annakna kalpasan ti naaramidna a biddut?

Aniaman kadakuada, maysa daytoy a paripirip ti suspek a mangaramid iti maysa a banag agsipud ta ipatpategna ti pamiliana ken dina kayat nga agsisinada.

Aniaman ti nagtaray iti panunotna nga aramidenna kadayta a kanito, posible a saanton a maammuan pay ta inkuyognan dagiti sungbat iti tanem.

Kabayatanna, saan pay la a maako ni Tata Jerry a lima a bangkay ti nakamassayag iti pagtaenganna maigapu iti masaker a nangpekka iti natalinaay a panagbiagda.#

Comments are closed.