Footer

Arson suspect, natuntonan nagpainganna

CABUGAO, Ilocos Sur – Inaresto dagiti elemento ti polis ti suspek iti pannakauram ti maysa a balay ditoy iti nagpaknianna a pagtaengan sadiay Barangay Baclig idi agsapa ti Agosto 7.

Inaresto dagiti polis ni Jecer Belen Seatriz, addaan legal nga edad, baro, ken residente iti Barangay Rizal ditoy nga ili, iti nagpaknianna a pagtaengan ti maysa a Jerry Periña y Seatriz iti Barangay Baclig babaen ti insayangkatda nga operasion idi agarup alas 7:00 ti bigat ti nadakamat nga aldaw.

Ni Belen ti kangrunaan a suspek iti pannakauram idi malem ti Agosto 4 ti balay ni Marilyn Belen y Agbayani nga agdama nga agnaed sadiay USA.

Segun iti inbestigasion dagiti polis, sakbay ti uram, mapapati a simmublat ni Belen, maysa a deportee ken mapapati a drug dependent, iti posporo iti maysa a tienda iti asideg ti balay ti biktima.

Sumagmamano nga istambay ti nakakita ken ni Belen a rimmuar manipud iti balay sa nagtaray a nagpalaud  sumagmamano a kanito sakbay ti pannakauram ti nasao a balay.

Mapapati a nangrugi ti uram iti kayo a pagagdanan ti balay sa nagwaras iti kisame.

Nagpaut ti uram iti 25 minutos sa nakontrol dagiti bombero.

Awan ti naireport a nasugatan iti nasao nga insidente ken saan pay nga ammo ti pateg dagiti nadadael.#