Footer

Kape ti imulada iti nangato a daga

Salaysay Ni: Danny Antalan

(Umuna iti dua a paset)

 

 

NARIGAT ti panagbiag iti kabambantayan.  Manmano ngamin ti mula a maitukit ditoy a nasayaat ti panagdakkel ken panagbungana.  Maitudtudo a rason ti sabsabali a klima ken klase ti daga kadagitoy a lugar.  Narigat pay a maidanon dagiti kasapulan ni mannalon kas iti ganagan, bin-i, ken makinaria.

Adda ngarud dagiti agindeg ditoy a masulisog nga agmula iti maiparparit a marihuana.   Nalaka la ngaruden nga imula, maiyanatup pay iti klima ken nangato ti presiona.  Ngem ti rigatna, illegal ken posible a pakaibaludan ti panagmula iti marihuana.

Agsipud ta maiparit, kayat dagiti sumagmamano a lumugar  a liklikan ti agmula iti marihuana.  Ngem gapu iti rigat ti panagbiag, kumpetda iti patadem.  Adda dagiti nasulisog nga agmula iti marihuana kas dagiti sumagmamano nga agnanaed iti nagdulonan ti Ilocos Sur, La Union ken Benguet.

Ngem ti makadakes, no adda panagraut nga isayangkat ti pulisia, maireport iti diario nga iti Licungan ti maysa kadagiti lugar a nagpag-utan iti marihuana ket agbalin a dakes ti imahe ti ili.

Daytoy ti kayat ti gobierno munisipal nga ikkaten nga imahe ti Licungan, Sugpon, Ilocos Sur.

Gapu itoy, agtultuloy ti panagbirok ti lokal a gobierno iti wagas tapno matulongan dagiti agindeg.  Malaksid ngamin iti saba, kamote, laya ken buyboy, awanen ti nalag-an a wagas a pagbiagan dagiti agindeg.

Di met agkatnay ti maapitda iti pagay nga imulada agsipud ta di met nalawa ti talonda ta bato dagiti dadduma a bakras ti bantay.

Idi immasideg ti Tanim Kalikasan, Inc. ken ni Mayor Fernando Quiton tapno tulonganna isuda nga agmula iti kape a mabalin a pagbiagan dagiti agindeg, naragsakan ti mayor.

Daytoy a mula ti makitkita ti Tanim Kalikasan, Inc. a kasayaatan nga imula. Kaykayat ngamin ti kape ti agbunga iti nangato a parte ti kabambantayan, nangruna no nalamiis ti aglawlawna.

 

BARANGAY LICUNGAN

 

Saan nga asi-asi ti umuli, sumalog, ken kumalipkip iti bakras ti bantay tapno makadanon iti Barangay Licungan, Sugpon, Ilocos Sur.  Napalikmutan ti Licungan iti Barangay Tubaday, Santol, La Union iti laud, ken Barangay Culiang iti Kibungan, Benguet.

Manipud iti Balaoan, La Union a yan ti national highway, agdua nga oras ti biahe nga agpadaya, lumabas iti ili ti Santol, umuli iti immuleg a kalsada ti barangay Ramut nga agtungpal iti Sitio Palayeng iti met laeng Santol.  Manipud ditoy, magnakan agingga iti Licungan.

Umuli ken sumalogka iti desdes iti igid ti bantay iti dua nga oras agingga a madanonmo ti Amburayan River a nagbeddengan ti Palayeng ken Licungan.  Agtudtudo wenno saan, agluganka iti bilog tapno maballasiwmo ti napegges a karayan. Rakit ti pagluganam a bumallasiw iti karayan.

Kalpasan ti karayan, pasang-at ti dalan ket kalpasan ti nasurok maysa oras a sang-at, makitamon dagiti balbalay a liningdan a temporario dagiti angep iti kabambantayan.   Daytoy ti Licungan, Sugpon.

Masarakan ti Licungan iti 900 meters nga elebasion. Agarup lima nga oras a biahe-pagna manipud highway iti Balaoan.  Uppat nga oras a pagna.

(Adda tuloyna)