Footer

Mapno Met Ti Salop

Sarita ni Rilo A. Bedo

(Maikadua a paset)

 

 

Sangkakuna ni Pari Jojo nga awan ti di agangot a naangtit a bugguong.

“Kalokuan!” kunak no kua kenkuana. “’Bag koma no di agpada ti kawikaw ti bagista!” Adda met tarakenna a kalapati a nababa ti tayabna.

Nalingta nga ikan ken nakelnat a bulong-kamotit ti naidasar iti lamisaan idi agsubliak iti kosina. Umas-asimbuyok a kape ti naipaabay.

Nagbuggoak. Nagdiretsoak nga inigup ti kape. “Imasnan, ‘Ma!” inkiddayko ken ni baket a nangsango kaniak.

“Kunkunam sa met?” inlibbina.

“Sammet, a!”

Naglabayak. “Manganka metten, a,” kinunak idi kitkitaennak met lattan.

“Nalpasakon,” inyisemna.

Nagkammetak lattan ta naim-imas ti pannangan.

“Naimas met laeng?” sinaludsodna.

“Super, ‘Ma!” inkiddayko. “’Wanen ti pagkunaak basta sika ti nagluto…”

“Hmp, baka met no naumakan iti lutok, ‘Pa?” immisuotna.

“Saanto a pulos, ‘Ma. Kaniak a biang, sika ti kaimasan iti luto…” pinaludipak.

“Addaytaka manen,” marabettak ti isemna. “Sabali manen ti lawlawatem!”

Agpalpalpaak iti indayon iti sirok ti santol iti sikigan ti balay idi mapasungadak ni tatang. Arig maitibkol iti pardasna a magna. Agnaed iti sidong da Ading Rilo ken Ipag Margie iti dayaenmi.

“Naimbag ta addakan!” intabbaawna, a nakaklaatak,  idi makaasideg.

“Apay kadi, ‘Tang?” inamadko.

“Naggapuam ta dika nagawid idi rabii?” inkusilapna.

Imbagak ti kas iti nasaok ken ni baket.

“Ngata?” intukodna. “Wenno inugmokam ti babaim?”

“Tatang?” nakudkodko ti ulok. “Dikay pay, ‘ya, naruam iti panagaw-awidko?”

“Dika agar-aramid, loko! Ti kunam, awan maipalpalapayag kaniak?

“Nga ania, ‘Tang?’

“Dika man! Agsardengkan sakbay nga agbabawika!”

“Dikay maawatan, ‘Tang…”

“Adda babaim!”

Naalimpayengak.

“Hambol ‘toy anakyo, ‘Tang,” kinunak idi maalawko ti riknak.

“Hambog, a, isu!”

“’Nia ket ni tatangen, ‘ya,” inlibbik. “Ti la masasaoyo. ‘Ray man damagenyo ken ni baket no adda pagkurkurangak…”

“Dimon yalis ti alipuspusko, loko! Tandaanam ketdi daytoy… ti naulimek a tao no isu ti maloko, arigna ‘tay agpagunggan a toro!” ket timmallikuden.

DOMINGO. Nasapakami ken baket a nagpelles ta inkam makimisa. Agsakadakamto metten kadagiti tagilakona.

Daytoy met nga agsapa ti patanganmi ken Rita nga agsarakkami iti dati.

“Aluadanyo no bunarenkayo,” kinuna ni Komari Grace a nakakita kadakami idi rummuarkamin iti inaladan ti simbaan.

Ammok a pangkantiawna manen daytoy. Nagswitkami ngamin ken ni baket a makitkitana. Saan a kas kaniana nga agmaymaysa a makimismisa ta awan man la ti eesman ni lakayna a makimisa. Kaykayat daytoy ti maki-chess kadagiti barkadana iti plasa.

“Sika talaga, Mare,” iniseman laeng ni baket.

“Nakaaapalkayo… Ngem ammoyo, adda pay la kurangyo?”

“Ania met, Mare?”

“Anak, a!”

“Madanonto dayta, Komare,” kinunak.

Masdaawak met ketdi ta iti pito tawenmin nga agdendenna ken baket, dikam met laengen maparaburan iti anak. Nagpatsek-upkami payen iti doktor. Normalkami met.

“Dumtengto latta, ‘Pa,” sangkakuna ketdi ni baket.

Binirokko ni Pari Jojo idi makadanonkami iti plasa. Napaisemak idi masaripatpatak iti sango ti maysa a groseria. Kampay idi, diak nakita.

“Kompadre,” intapik ni Pari Jojo.

“O, kompadre, sika gayam…” kinunak. “Apay?” Nagsardengkami ken baket.

“Naggapuak idiay balayyo, Kompadre, ngem kinuna dagiti karrubayo a nagpaplasakayo isu nga addaak ditoy. Papaayabannaka ni Mr. Tong.”

Kinitak ni baket.

“Sige, ‘Pa, mapanka,” naawatanna ti kayatko a sawen.

Nagkuyogkami ken ni Pari Jojo a limmaksid iti plasa.

“Bilibak met kenka, Pari,” kinunak idi makaadayokamin. “Bagaymo ti agartista!”

“Siempre, a!” intams-apna. “Ngem, ne, sikanto met ti makaammo ken ni baket no adda lakadmi ken Aida,” ti ‘tarakenna’ ti kayatna a sawen.

“Aprub, Pari!”

Nangalaak iti traysikel a mangitulod kaniak iti pagkitaanmi ken ni Rita. Kalpasanna, nagtaruskamin iti balayda. Awan dagiti dadakkelna ta napanda idiay Ilokos a yan ti maysa pay nga anakda.

Alas tresen iti malem idi rummuarak iti balay da Rita. Naladawen ti panaglemmengko idi masaripatpatak ni baket. Kasano a natuntonannak?

“Ayupka!” imper-akna. “Agpayso gayam ti maisaysayangguseng!”

“’Sino dayta, honey?” ni Rita ti adda iti likudak. Sinarunonak gayam.

Ad-addan ti pungtot ni baket. “Siak ti baketna!” imbikagna.

Manglalais ti isem ni Rita. Ammona met ketdi nga adda baketko ngem kinayatnak latta. “Agpayso ti ibagbaga daytoy a babai, honey?’ insurdona.

Awan simngaw a timekko.

“Manipud ita, Ruben, lipatemon nga adda asawam!” inkusilap ni baket sa timmallikud a kasla awan aniamanna.

(Adda tuloyna)

Comments are closed.