Footer

Ti report ni PNoy ken ni Boss

Ni  Danny B. Antalan

 

 

Report Kay Boss.  Daytoy ti titulo ti maikatlo nga State of the Nation Address ni Benigno Simeon Aquino III, ti presidentetayo ditoy pagilian a Pilipinas.  Boss, kunana kadagiti  nasurok 91 a milion a kakailian nga agnanaed iti nasurok 7,000 a purpuro iti Luzon, Visayas ken Mindanao.

Kaatiddogan a SONA ti maysa a presidente ti Pilipinas nga agarup 1 oras ken 30 a minutos.  Iti dayta a kaatiddog, namin-adu a natipatan gapu kadagiti inreportna kadagiti nangpadaan iti SONA.  Ngem adda met dagiti nangpadaan a saan a nangtipat, no di ket ketdi nangiplastar kadagiti plakard, nangisayangkat ti protesta ken demonstrasion, ken nanguram iti effigy… ken patrol car ti Philippine National Police.

Dagitoy dagiti dina nalipatan nga inreport:

  • · 8 credit rating upgrades, 44 record high iti stock market, ken 6.4 porsiento a ngimmatuan  ti gross domestic product iti umuna a tallo a bulan ti 2012
  • · Ngimmato ti bilang dagiti marigrigat nga umawat ti conditional cash transfer manipud iti 760,357 idi 2010 iti 3.1 a milion idi Pebrero 2012.  Kalikagumna nga umabot daytoy iti 3.8 milion agingga sumaruno a tawen.
  • · 85 porsiento a Filipino ti karamanan iti listaan ti Philhealth program.  Ti napintas a damag, uray dagiti marigrigat ti makapanen iti ospital uray  breast cancer, prostate cancer, acute leukemia ken dadduma pay a sakit a kunkunada a para baknang laeng idi ti sakitda.
  • · Iti Edukasion, namnamaen a makabangon iti 66,800 a classroom a kasapulan ti pagadalan.  Nakaited iti 2,573,212 a tugaw ken 61.7 a milion a libro.  Karaman ditoy ti 43.61 porsiento a ngimmatuan ti budget dagiti unibersidad ken kolehio iti pagilian.
  • · Bimmaba ti unemployment rate manipud iti 8 porsiento iti 6.9 a porsiento.
  • · Iti inprastraktura, namnamaen a malpas agingga 2016 ti eropuerto iti Panglao Bohol; Daraga, Albay; Laguindingan, Misamis Oriental; ken panaka-upgrade ti airport iti Mactan, Cebu; Tabloban, Leyte; ken Puerto Princesa, Palawan.  Uray ti Ninoy Aquino International Airport ket manamnama a malpas iti sumaruno a tawen.  Iti 2015,  malpas met ti extension ti Light Rail Transit Line nga agturong agingga iti Cavite.
  • · 10 a milion a turista ti arapaapna a magun-od iti terminona.  Iti daytoy a tawen, target ti 4.6 milion a turista.  Manipud iti 1.3 a milion idi panawen ni PGMA, nagbalinen daytoy a 2.1 a milion ita.
  • · Iti bagas, nagbalin laeng a 500,000 metriko tonelada ti importasion manipud iti 1.3 milion a metriko tonelada  idi 2010.
  • · Iti Armada, nailatang ti P28 a bilion para iti modernisasion ti military.  Ngumatngato pay daytoy kadagiti sumaganad a tawen

Kabayatanna, dagitoy met ti nalipatan nga inreport ti presidente:

  • · No kasano a solbaren ti agtultuloy a panagpangato ti presio ti gasolina gapuna a ngumatngato met ti presio ti bagas, noodles, sardinas, nateng ken dadduma pay a magatgatang.
  • · No kasano a masungbatan ti insigida a panaglayus uray bassit laeng a tudo nangruna idiay Metro Manila ; landslides, ken layus kadagiti kabanbantayan a pakatkatayan ti adu a tattao.
  • · Umad-adu a matmatay gapu iti riding in tandem agraman ti di panakasolbar kadagiti kaso dagiti immun-una nga insidente ti pammapatay kas ti Maguindanao Massacre.
  • · Ti agtultuloy a gubat iti nagbaetan ti gobierno ken NPA ken MILF gapu ta awan pay ti napagtulagan a nasayaat mainaig iti peace agreement.
  • · Ti pagdurdur-asan iti agsubsubli iti saritaan a Cha-Cha.

Dinakamatna ngem dina unay inikkan ti adu panangilawlawag ken importansia dagiti agdama nga isyo.  Liniklikan wenno talaga a pahapyaw laeng ti panangdakamatna maipanggep iti Reproductive Health Bill,  ti agdama a tension iti panaginnagaw iti purpuro iti nagbaetan ti Pilipinas ken Tsina, ti panangpili iti kabarkbaro a Chief Justice ti Korte Suprema ken ti revamp a mapasamak iti gabinetena.

Iti pakabuklan, nabugas ti SONA ni Presidente PNoy. Napintas a report kadagiti Bossna a kaadduan ti agkunkuna a marigrigat pay laeng ti panagbiagda.  Ngem ala, sapay koma ta mariknanto dagitoy a napipintas a reportna.  Ta kas kunana met, addatayo iti nalinteg a dalan.#

 

Comments are closed.