Footer

Miembro ti Basag-Kotse Gang, natiliw

CAMP BGEN OSCAR M FLORENDO – Tiniliw dagiti polis ti maysa a masuspetsa a miembro ti Basag-Kotse Gang kalpasan ti hot pursuit operation nga insayangkatda sadiay Bauang, La Union idi Agosto 15.

Natiliw dagiti polis ti suspek a ni Silvano J. Lara, 50, naasawaan, ken residente iti Barangay Marco Polo, Novaliches, Quezon City bayat a nakalugan iti public utility vehicle sadiay Bacquit Sur, Bauang, La Union.

Segun iti report a dimmanon ken Police Chief Superintendent Franklin Jesus B. Bucayu, regional director of Police Regional Office 1 (PRO1), pinasardeng dagiti polis ti Ford Everest a minaneho ti suspek gapu iti panaglabsingna iti trapiko ngem naglaylayon ti lugan.

Sinurot dagiti polis ti lugan ket nakitada iti Oasis Gas Station ngem idi umasidegdan, nagpataray ti suspek a nagpaabagatan.

Nagpatulong dagiti dua iti San Fernando City police station sada kinamat ti suspek. Nasarakanda ti lugan a naabandona iti asideg ti barangay hall iti Pagdalagan.

Maysa a saksi ti nangibaga kadagiti polis a naglugan ti suspek iti dyipni nga agpa-Bauang. Kinamat dagiti polis ti dyip agingga a nakamakamda ti nagluganan daytoy iti Bacquit, Bauang, La Union.

Segun ken ni Police Senior Superintendent Ramon O. Purugganan, La Union provincial director, nausar ti lugan iti sumagmamano a panagtakaw iti siudad.#

Comments are closed.