Footer

Tudtudo ti insangbay ni Bagyo Helen iti I. Sur, I. Norte

LAOAG CITY –  Nagpukaw ti koriente iti sumagmamano nga ili ti Ilocos Norte gapu iti napigsa a tudo ken panagkimatna nga insangbay ti Bagyo Helen.

Nagawan ti silaw ti sumagmamano a barangay ti Laoag, kasta met iti sumagmamano a paset ti Batac City ken maysa a barangay iti Paoay.

Nupay kasta, nagsubli met laeng ti silaw babaen ti dagus a panagresponde dagiti linemen ti Ilocos Norte Electric Cooperative.

Kabayatanna, napigsa a bayakabak ti indateng ni Bagyo Helen iti probinsia ti Ilocos Sur idi Agosto 14 ken 15.

Manipud iti Signal No. 1, naipangato ti pagsenialan iti probinsia iti Signal No. 2 nangrugi idi rabii ti Agosto 14 kalpasan a nagbaliw ti direksion ni Bagyo Helen ket limmasat iti Isabela.

Sumagmamano a barangay iti Sinait a nalayus. Pagattumeng met ti danum iti Liberation Boulevard iti Vigan City ngem dagus met la a nages-es idi nagsardeng ti tudo.

Gapu iti awan sarday a tudo, naideklara nga awan ti klase iti pre-school, elementaria ken sekundaria.

Simmirnaat ti panawen idi Agosto 16 kalpasan a nakapanaw ni Bagyo Helen iti sakup ti responsibilidad ti pagilian.#

Comments are closed.