Footer

BANNER NEWS: 502 krimen napasamak iti Enero-Hulio, 2012: report ti PNP Ilocos Sur

VIGAN CITY – Nangatngato ti bilang ti krimen a napasamak manipud iti Enero 1 agingga iti Hulio 31, 2012 no maikumpara iti krimen a napasamak iti kastoy met laeng a tiempo idi 2011, daytoy ti inreport ni PNP Provincial Director  PS/Supt. Noel Amoyen bayat ti Provincial Peace and Order Council Meeting a naangay iti Baluarte ditoy idi Agosto 23.

Segun iti presentasion ni Amoyen, nangatngato iti 73 ti bilang dagiti krimen iti immuna nga innem a bulan daytoy a tawen ta immabot iti 502 a krimen idinto a 429 laeng ti napasamak a krimen iti daytoy met laeng a period idi napan a tawen.

Nupay bimmaba iti 9% ti index crimes iti umuna nga innem a bulan ti 2012 ta agdagup laeng iti 273 manipud iti 300  idi 2011, nangatngato iti 43.55% ti non-index crimes ita a tawen  agsipud ta adda nairekord a 229 no maidilig iti 129 idi napan a tawen.

Kasta met a nupay ngimmato iti 1.5% ti average monthly crime rate ditoy probinsia iti daytoy a tawen nga immabot iti 10.4 no maikumpara iti 8.9 idi 2011, immadu ti nasolbar a krimen iti 2012 kas ipakita ti 65.9% crime efficiency solution no maidilig iti 59.20% idi 2011.

Inreport ti provincial director nga iti 62 a kadagupan dagiti shooting incidents iti probinsia ita a tawen, 12 kadagitoy ti insayangkat dagiti riding in tandem. Nupay kasta, nababbaba daytoy ngem iti nairekord a 77 nga insidente ti pammaltog a 15 kadagitoy ti gapuanan dagiti kriminal a nakamotor.

Kinuna ni Amoyen a 10 kadagiti 40 a nairekord a kaso ti panagtakaw iti probinsia ti napasamak iti Vigan City; 35 ti natakaw a motorsiklo,  maibilang a kas kaso ti carnapping a nakaarestaran iti 8 a tattao.

Nakatiliw pay dagiti polis iti 34 a tattao iti  operasionda  kontra droga ngem awan ti naarestoda iti 3 nga operasion nga insayangkatda kontra iti illegal a sugal.

Kinuna ni Amoyen nga 44 a operasion ti impatungpalda kontra iti loose firearms a nakaarestaran ti 35 a tattao idinto a nakakumpiskada iti 40 a nadumaduma ti klasena nga armas ken 15 ti naisuko kadakuada.

Mainaig iti no helmet, no travel policy, umaboten iti 4,295 nga operasion ti impakatda a nakasitaran ti 4,313 a tattao, idinto nga addan  3,741 nga operasion iti no plate no travel policy a nakasitaran ti 2,712 a tattao.

Inreport pay ni Amoyen nga immabut iti 320 dagiti aksidente iti kalsada a nakaimbolbaran ti 348 a motorsiklo ken 303 a sabali pay a klase ti lugan a nakatayan ti 58 a tattao ken nakasugatan ti 288.

Base pay iti rekord ti PNP, adda 57 a kaso kontra kadagiti ubbing ken 77 a kaso kontra kadagiti babbai.

Segun ken ni Amoyen, awanen ti uray maysa a barangay a kontrolado dagiti lokal a komunista a terorista nupay adda pay 21 a threatened barangays ken adda 15 a sightings dagiti kabusor ti turay iti Narvacan, Suyo, Sta. Lucia, Sta. Cruz, Sta. Maria, San Emilio ken dadduma pay a kabambantayan a paset ti Ilocos Sur.

Dua a miembro ti NPA ti simmuko itay nabiit a pakairamanan da Jordan Vasquez a taga-Cervantes ken John Mariano a taga-Alilem.

Kabayatanna, maysa a resolusion ti indatag ni Lt. Col. Desiderio Alaba ti 81st IB a mangideklara iti Ilocos Sur a Peaceful and Ready for Development. Nupay kasta, dinawat ti PPOC a maipakaammo nga umuna  kadagiti local chief executives dagiti ili ken siudad tapno maammuan ti reaksionda iti nasao a resolusion santo maaprobaran daytoy iti sumaruno a meeting ti PPOC.

Inyawat pay ti Department of Interior and Local Government ti Seal of Good Housekeeping iti provincial government ti Ilocos Sur, kas pammaneknek ti nadalus ken nalinteg a panangiturayna. (Mancielito S. Tacadena)

Comments are closed.