Footer

Droga, ramramit ti droga, nakumpiska iti kasera aglib-in

CANDON CITY – Sinukisok dagiti polis ti kasera dagiti agkalib-in idi Agosto 17 ket nakumpiskada iti droga ken ramramit para iti droga.

Iggemda ti search warrant nga inyisio ni Judge Gabino B. Balbin, Jr. ti RTC Branch 23, Candon City, sinukisok dagiti polis iti panangidaulo ni PSupt. Marlo Castillo ti kasera da Donnie Peñalosa y Robles, 42, ken ti kalib-inna a Marites Borje/Marites Peñalosa  sadiay Barangay Bagani Gabor, Candon City idi agarup alas 3:15 ti malem ti Agosto 17.

Insayangkat dagiti polis ti panagsukisok iti nasao a balay iti imatang dagiti bumalay a Rizalina Borje, Barangay Kagawad Elmer Gallardo ken Kagawad Marilou Calindas ken Danny Antalan ti DZTP.

Nakakumpiska dagiti polis iti maysa a bassit a plastic sachet a mapapati a naglaon iti shabu, drug paraphernalia a pakaibilangan ti 2 a broom stick, maysa a  plastic straw tooter ken maysa a plastic scope,  mapapati nga addaan amin iti shabu residue, maysa a disposable lighter, ken 6 a nadumaduma ti kadakkelna a plastik.

Mapapati a naangotan dagiti suspek ti operasion dagiti polis ket naglibasda sakbay a makasangpet dagiti agsukisok.#

Comments are closed.