Footer

Naghold-ap iti negosiante, natiliw dagiti polis; 2 kakaduana, mabirbirok

SINAIT, Ilocos Sur – Naipiskot dagiti polis ti maysa kadagiti nanghold-ap iti maysa a negosiante ditoy nga ili sadiay Badoc, Ilocos Norte idi malem ti Agosto 17 ken agdama a birbirokenda dagiti dua pay a kaduana a masuspetsa  a nagpakni iti Ilocos Norte.

Innaganan dagiti polis ti natiliwda a maysa a Ronald Bitonio y Gascon, 27, baro, ken residente iti Barangay Bannuar, San Juan, Ilocos Sur.

Natiliw dagiti polis ni Bitonio sadiay Badoc, Ilocos Norte babaen ti pursuit operation nga insayangkat dagitoy kalpasan ti pananghold-apda ken ni Marcelino Sudayon y Silvania Jr. 40, naasawaan, businessman ken residente iti Brgy. Ballaigui, Sinait, Ilocos Sur  iti uneg ti G-Lah Store a paglakuanna iti bagas idi agarup alas 5:00 ti malem ti Agosto 17.

Segun iti biktima, adda iti uneg ti tiendana a masarakan iti asideg ti national highway ti Barangay Rang-ay idi kellaat a simrek ti dua a lallaki sada pinaturongan iti paltog ken indeklara ti hold-ap.

Intaray dagiti suspek ti belt bag ni Sudayon a naglaon iti sumurok kumurang a P20,000.00, ti lisensiado a paltogna a cal. 9MM pistol (Armscor), driver’s license, IDs, certificate of registration ti motorsiklona, resresibo, ken napapateg a dokumento.

Naglibas dagiti suspek babaen ti maris asul ken puraw a Rusi Jumper ni Sudayon a nakaparking iti ruar ti tiendana a nagturong iti amianan a direksion.

Nangiwayat dagiti nagresponde a polis iti manhunt operation ket narekobreda ti motorsiklo iti abaga ti kalsada a sakup ti Barangay Sta. Cruz, Sinait.

Segun dagiti di nainaganan a saksi, simmakay dagiti suspek iti nalabaga a Nissan Patrol Safari, adda plaka a XTB 168 ket nagpaamian daytoy.

Intuloy dagiti polis ti panangkamatda iti lugan ket nakitada daytoy a nakaparking a sumango iti abagatan a direksion iti abaga ti kalsada iti Badoc, Ilocos Norte ket tiniliwda ti drayber a nabigbig idi agangay a ni Bitonio.

Iti panangpalutpot dagiti polis ken ni Bitonio, innaganan daytoy dagiti kaduana a da Francisalden Regundique, residente iti Brgy. Cabanglutan, San Juan, Ilocos Sur ken maysa nga agnagan iti Jay.

Segun ken ni Bitonio, limmugan dagiti dua iti minibus nga agturong iti amianan.

Iti pannakaisurat daytoy, agtultuloy ti panangbirbirok dagiti polis dagiti dua pay a suspek iti panaghold-ap.#

 

Comments are closed.