Footer

PNP regional director, binisitana luglugar kakaruan a dinidigra ni Bagyo Helen

CAMP BGEN OSCAR M FLORENDO – Binisita ti police regional director ditoy dagiti lugar a kakaruan a dinidigra ni Bagyo Helen idi Agosto 16.

Personal a binisita ni PChief Supt. Franklin Jesus B. Bucayu ti Barangay Daramuangan iti Naguillian, Barangay Bautista iti Caba, ken Barangay San Benito Norte iti Aringay, dagiti kakaruan a nadidigra a lugar iti La Union.

Napigsa a tudo ti insangbay ni Bagyo Helen a nanglayus kadagiti nadumaduma nga il-ili iti Region 1 nangruna iti probinsia ti La Union.

Nalayus ti 42 a barangay iti Pangasinan, 161 idiay La Union, 41 iti Ilocos Norte, ken 9 iti Ilocos Sur a nakaapektaran iti kadagupan a 25,079 a pamilia.

Kas maibatay iti kaudian a data manipud iti Office of Civil Defense Regional Center 1 (OCDRC1), 6 ti naireport a natay iti Region 1: 2 iti Pangasinan, 2 iti Ilocos Norte, 1 iti La Union, ken 1 iti Ilocos Sur.

Agdagup met iti 16 ti naireport a nadunor iti La Union ken Pangasinan idinto a maysa  ti naisalakan iti Ilocos Norte.

Kinuna ni Bucayu nga awan ti major casualties iti iduduprak ni Bagyo Helen gapu iti kinaalibtak ken kinasagana ti komunidad a binuyogan iti nadaras a tulong manipud kadagiti polis, dadduma a law enforcement agencies, non-government organizations ken disaster rescue teams.

Kabayatanna, binisita ni Bucayu ti Bureau of Jail Management and Penology (BJMP) iti Agoo ken iti Pugo Police Station idi malem ti Agosto 16.

Kadua ni Bucayu da PSSupt. Ramon O. Purugganan, La Union provincial director, PSupt. Rollie M. Saltat, acting chief ti Regional Police Community Relations Division (RPCRD), PSupt. Jovencio S. Badua, Jr., officer in charge ti Regional Public Information Office (RPIO) a nagbisita kadagiti nadakamat a lugar.

Impatalged ni Bucayu kadagiti balud iti Agoo BJMP ti patas ken umisu nga inbestigasion iti kasoda ken iti kalinteganda iti umno a proseso ti linteg.

Impatalged pay ti regional director iti maysa a babai a balud a naakusaran iti panaglabsing iti droga ken mapapati a biktima ti panagrames a saan a mapaidaman iti kalintegan a maaddaan iti abogado. Inyunay-unay ni Bucayu a marespeto ti kalintegan a pangtao ti balud.

Iti met Pugo police station, pinalagipan ni Bucayu, dati a pangulo ti Human Rights Affairs Office (HRAO) iti Camp Crame, dagiti naka-assigned a polis ti kanayon a panangprotektada iti kalintegan a pangtao.

“Kas human rights advocate, ken kas miembro iti kapolisan a gayyem ti komunidad, trabahotayo ti mangtaginayon iti kalintegan iti tunggal lallaki ken babbai, nakabasol wenno saan,” kinuna ni Bucayu.#