Footer

Ti Kabarbaro A Pagturongan Dagiti OFW

Komentario Ni Christine Marie Verzosa

(Maudi a paset)

 

No saan la koma a destabilisado ti relasion ti mangmangged ken agpatrabaho iti pagilian, saan koma nga adu ti pimmanaw a manufacturing companies ket adu koma ti trabaho ditoy. Uray saanen a mapan iti ballasiw taaw dagiti obrero no di ket ti pagilianen a mismo ti agawis pay iti ad-adu nga obrero kadagiti sabsabali a nasion tapno masupusopan ti pagkurangantayo ti human resources. Kastoy ti mapaspasamak kadagiti pagilian a yan dagiti manufacturing companies.

Kadagitoy a tiempo a limmangit ti presio dagiti produkto a petroleo a nangitayab-nangipangato ti gastuen iti transportasion, ti nakulbet a masolusionan a recession a nangipaay iti pannakadayyeg ti labor sector, ti ibababa ti gatad ti doliar a nangkerras ti gastuen ti eksportasion, inayon pay ti makapalibbi-makapagarko iti kiday nga euro zone meltdown, dimmegdeg pay iti napasamak a ginggined ken aluyo ken peggad ti nadadael a nuclear plant sadiay Japan, ken dagiti mapaspasamak a civil unrest gapu iti kinakisang ti trabaho, dagiti nangipaay iti pagpanunotan dagiti agpupuonan iti manufacturing iti USA a tumakder-panawanda ti economic chessboard wenno baliwanda ti istratehia wenno trend nga idi pay la 1970 a nangrugi.

Napanunot dagiti dadduma a manufacturing companies nga agsublidan iti pagilianda. Nagsublin-nagawid iti USA dagiti sumagmamano a manufacturing companies a kas iti Caterpillar, General Electric (GE), Dow Chemical, NCR nga agar-aramid iti cash register, Sauder Woodworking, ti GF Agie Charmilles nga agparpartuat kadagiti machine tools ken dadduma pay a manufacturing companies. Kayat met a tuladen dagiti dadduma daytoy a trend.

Awaganda daytoy a panagsubli iti re-shoring.

Ti dakkel a saludsod: pakairanudan kadi ti Filipinas ken dagiti obrero a Filipino ti re-shoring dagiti manufacturing companies?

Ti sungbat, wen! Dakkel ti tiansa dagiti obrero/mangmangged nga agturong sadiay USA a nakaipatakderan dagiti manufacturing companies a nagre-shore. Ngamin agkurkurang ti USA kadagiti skilled labor positions nga isu dayta ti naisangsangayan a kualipikasion dagiti obrero iti Filipinas.

Saan la dayta, napadasanen ti USA ti kinapudno ni Filipino, ti dedikasionna iti trabahona, no kasano a sanguen ken solusionanna dagiti lumtuad a parikutna, agtrabaho iti limitado wenno uray pay awanan iti superbision, ken nalaka a makikomunikasion ni Filipino iti asinoman a puli ken katatao gapu iti laingna nga agsao iti English, ken dadduma pay a kualipikasion a naisangsangayan a sapsapulen dagiti manufacturing companies.

Sabali laeng ti nairut a langenlangen ti relasion ti USA ken ti Filipinas a nangiburay iti dakkel a bentahe dagiti obrero.

Iramanen ditan ti kinaadu a bilang dagiti Filipino-Americans a mangited iti nair-irut a relasion.

Adda met  dakkel a parikut a sanguen dagiti obrero wenno Overseas Filipino Workers nga agturong sadiay. Natural dayta, saan a maawan. Saan ketdi nga agpapada ti pagannurotan dagiti estado ti USA itoy.

Ti saludsod, agbalinto kadi a kualipikado nga agaplay iti permanent citizenship dagiti obrero wenno agtalinaed laeng ti visada a kas working visa ken addaan iti limitado a dua a tawen? Dayta ti isyo a lumtuad.

Kadagiti manufacturing companies iti Taiwan, South Korea ken dadduma pay a nasion ket agpatingga laeng iti dua wenno tallo a tawen ti visa dagiti obrero malaksid kadagiti adda iti nangatngato a posision a mabalinda pay ti agaplay iti permanent residency.

Ngem mautek met ni Filipino, kas iti naammuanmi nga inaramid ti sumagmamano nga am-ammoni ken posible pay kadagiti dadduma nga OFW, nagsukatda laeng iti nagan tapno makapagsublida nga agtrabaho wenno iti sigud a trabahoda. Panuynoyan kano dagiti agpatrabaho daytoy ta masayanganda unay a mapukawda ti serbisio ni Filipino. Ngem itoy a kaso, no dadduma, lalo dagiti addaan iti rikki ti pannakirelasionda kadagiti pagtartrabahuanda, agtinnag daytoy a pannakaabusoda no di man pannakaideporte wenno agbalinda nga agallitaw wenno agtrabaho nga agalis-alis  ken awanan iti permanentea panggedan. Umarngi daytoy iti adu a kaso dagiti undocumented OFW.

Ngem no addaan iti eksperiensa dagiti OFW ken rekomendadoda ti Technical Education and Skills Development Authority (TESDA) ken addaanda iti napateg a pamilia – ipatpateg nga asawa ken annak a napanawan iti Filipinas, agsubli nga agsubli iti naituding a panawen iti nakaiyanakanna a daga. There’s no place like home!

Adda met posibilidad a sumurot dagiti outsourcing companies ken dagiti empleadoda ta napadasanen ken nasuboken dagitoy a manufacturing companies ti inalatda. Kas ti napasamak sadiay China nga immalisan dagiti manufacturing companies a simmurot dagiti outsourcing companies ken dagiti empleadoda ta inayaban a mismo ida dagiti manufacturing companies a kas katakunaynayda ken kabinnulig iti panagtaray ti negosio.

Iti daytoy a kabarbaro a trend dagiti manufacturing companies iti USA a re-shoring, naraniag la ketdi ti agsapa ni obrero a Filipino iti masakbayan.#

Comments are closed.