Footer

Addanto latta ti abagak a pagsadagam, best friend

Sarita ni Judith M. Simon

(Maikadua a paset)

 

Narikut ti sasaadentayo iti pagadalan. Kasla kakisang ti tudo iti kalgaw ti pannagsueldotayo. Agpannuray ti pagadalan iti scholarship nga ipapaay ti gobierno kadagiti ubbing. Kas kadagiti public schools, makaammon ti gobierno a mangbayad kadagiti estudiantetayo. Ket no kasta nga awan pay ti kuarta, agan-anustayo iti parsiak nga agtaud iti administrasion.

Diak man la nakita nga agalem ti mapaspasamak. Inspiradoka latta nga agisuro. Idinto a dakami nga awanan asawa wenno obligasion, marigatankami payen. Ngem sabagay, kinunkunak, adda pamataudanyo iti inaldaw-aldaw. Nalaingka nga agmula ken adu ti tarakenmo a dinguen.

Naragsakka a kasarsarita. Gapu kadayta, nupay kasano ti rigattayo iti pagadalan, kasla maawan a dagus ti kettangko no kasta nga agsinnukatta iti kapanunotan babaen ti text. Nabalitokan dagiti kapanunotam!

“Kaasi met dagiti ubbing no basta panawan latta idan,” kinunam iti naminsan. Nasaok ngamin no apay a dika agsapul iti sabali a panggedan idinto a tituladoka. Maysaka a rehistrado nga inhiniero!

“Commitment ti kasapulan. Saan laeng a kuarta ti makaited iti ragsak iti tao. Matumpongantay’ met daytoy no addaantayo iti pannakapnek iti ania man nga adda  kadatayo,” innayonmo pay. “No panawantayo ‘toy pagadalan gapu laeng iti kinakiddit ti sueldo, kasano pay dagiti ubbing a makuna a namnama ti pagilian?”

Kasanotay’ metten? kunak koma ngem diak ammo ta apay a nagbalin a balud ti dilak.

Kaaduan kadagiti nataenganen a kaduatayo ket awan papelna. Saanda a naipasa ti board-da ti kayatko a sawen. Kasta met kaniak. Diak ngamin naigasatan ti eksamen iti umuna ken maikadua a panageksamko. Naimbag ta iti maikatlo a daras, a maikatlo met a tawenko iti dayta a pagadalan, naipasak met laeng. Anian a ragsakko. Sika pay ti immuna a nangablaaw kaniak.

Nakunak idi iti bagik a kapit sa patalim dagiti kakaduatayo ta awan sabali a papananda. Nainget dagiti public schools iti panagalada kadagiti agisuro. Ken maysa pay, imbakbaketdan ti naggian iti nangisuruanta.

“Saan a kabaelan ti public schools nga alaen amin dagiti ubbing,” kinunam pay. “Nupay maregmeg laeng, kas kunada, dagiti ubbingtayo ta nagpilpilian, adda latta maarisit a gameng kadakuada…”

Kinapudnona, kaaduan dagiti agenrol iti pagadalantayo ket nagdalanen iti public school. Gapu ta dida malaon amin iti nasao a pagadalan, kapilitan a maipalladawda, dagiti wasay ti gradona, iti eskuelatayo. Dayta ti nakas-ang a panunoten. Sobsobra dagiti ubbingtayo!

Sabagay, sakbay gayam a naginhinieroka, Edukasion ti planom nga alaen. Ngem adda dagiti pasamak a di napakpakadaan a nanglapped iti dayta nga arapaapmo.

ITI daydi maudi a tawenko iti NQHS, nariknak no kasano ti paspasarem a rigat. Naynay nga idanonmo kaniak dagiti parikutmo babaen ti text.

Maip-ipitka iti agtintinnim-og a bato. Buriborennaka la unay ni baketmo gapu iti kinabassit ti mayawatmo a sueldom iti binulan. Ta pudno met a narigat ti sasaadentayo. Kayatna, dikan agisuro no kasta met laeng. Ngem um-umkis ti kaunggam a dimo kayat ti agsardeng ta ipagpagapum kadagiti ubbing.

“Addan pamiliam… ket masapul nga isu ti ipamaysam!” dayta ti sangkaibaga ni misismo, segun kadagiti text-mo. “Ania laengen ti serbi ti inadalmo no itulokmo lattan nga aglumotka iti dayta a pagadalan?”

Nagbalinak nga abaga a nangisadagam kadagiti rikriknaem. Naammuak pay a kanayonnaka gayam a pagsasawan ti asawam. Bassit laeng a banag, ken kaaduan a no dadduma, awan kaes-eskanna dagiti makagapu. Kasla awan pategna dagiti ar-aramidem iti inaldaw. Makabasolka pay no kasta a tugawam ti agsurat. Ania kan’ ti maal-alam kadayta? Nagadu a sao. Agkakasakit a sao!

Ngem no kasta a mangabak iti pasalip dagiti ikurkurimedmo a sinurat, anian a ragsakna. Ngem apagkanito laeng!

“Nagkapuykan, ‘ya!” kunananto pay laeng. “Kutit la’ng ti kabaelam a gun-oden!”

Nasakit kenka dagita a sasawenna ngem, kas kunam, inawatmo ti amin. Nagtalinaedka a naulimek. Ta no kasta gayam nga ikalukagmo ti bagim, sika pay ti dakes. Ad-adu manen ti masaona.

Nasaom amin dagitoy ta kinunam a siak laeng ti mabalin a pangipeksaam iti an-anek-ekem. Ket kastaak met. No adda rumsua a dimi pagkinnaawatan iti nobiok, sika met ti umuna a pangipakaammuak. Diak man ammo ngem nalablabes payen ngem kabsat ti nangibilangak kenka.

(Adda tuloyna)

Comments are closed.