Footer

BANNER NEWS: Armado a tattao a naggandat manghold-ap, nangsaneb kadagiti polis, masawsawar

ALILEM, Ilocos Sur – Agtultuloy ti panangbirbirok dagiti polis kadagiti armado a tattao a nagpanggep a manghold-ap kadagiti empleado ti maysa a kompania idi Agosto 25 ken nangsaneb kadagiti inbestigador iti nasao nga insidente iti sumaruno nga aldaw sadiay Sitio Dukisi, Barangay Apaya, ditoy nga ili.

Iti report manipud iti Provincial Police Office, agtultuloy ti panagsawar dagiti tropa nga indauluan ni PCI Geraban ti 1st RPSB ken operatiba ti  ISPPSC nga indauluan ni PSI Rabang kadagiti posible a paglemlemmengan dagiti di pay nabigbig nga armado a grupo.

Idi agarup alas 5:30 ti malem ti Agosto 25, ginandat dagiti dua a nakaaruat iti camouflage ken nakabonite nga armado a lallaki a hold-apen ti Nissan Navara pick-up a lugan ti Paramina Company a minaneho ni Paul Galibut y Dapiaoen, 32, naasawaan ken residente iti Poblacion, Alilem, Sugpon, bayat ti panagdaliasatna iti Sitio Dukisi, Barangay Apaya, Sugpon.

Segun ken ni Geno Fernandez, administrative officer ti Paramina Company, naggapuda iti maysa a bangko iti San Fernando City a nangiruar iti P1.5 million a panueldoda kadagiti mangmangged nga agtrabtrabaho iti Hydro repair maintenance project sadiay Sitio Dukisi, Brgy Apaya ket daldaliasaten ti luganda ti nadakamat a sitio idi kellaat a nagparang dagiti suspek a maysa kadakuada ti adda armasna.

Kinuna ni Galibut nga idi makitana dagiti suspek, pinatarayna ti luganda ngem nagpaputok ti nakaarmas a nakapuntaan ti makinlikud a windshield ti lugan ken nakadamgisan ti makannawan a pispisna.

Nupay nasugatan, intuloy ni Galibut a pinataray ti luganda agingga iti nakasublida iti project site.

Naglibas dagiti suspek iti saan nga ammo a direksion kalpasan ti insidente.

Idi agarup alas 3:10 ti malem ti Agosto 26, bayat ti panangisayangkat iti follow-up investigation dagiti polis ti Alilem nga indauluan ni Deputy Chief of Police Eduarto Mutong, pinaputokan ida dagiti armado a tattao a nakatiruan ni PO1 Johnson Andres Habon.

Immuna a naitaray ni Habon iti Tagudin Capiliariasis Center sa iti Lorma Medical Center, San Fernando City, La Union para iti pannakaagas ti sugatna.

Iti hot pursuit ken clearing operations nga insayangkat dagiti nagtitipon nga elemento ti Alilem Municipal Police Station nga indauluan ni  COP PSI Gerardo Manzano, R2 personnel nga indauluan ni PSI Ordinado, 1st RPSB a nakabase iti Bio, Tagudin ken Tagudin MPS nga indauluan ni PSI Napoleon Gao-ay, nakarekobreda iti kalapaw a kogon a mapapati a nagpuestoan dagiti armado a grupo idi sinanebda dagiti polis ti maysa a kapsula ti M16, 2 voters ID nga inyisio ti Comelec Sadanga, Mt. Province iti nagan ni Moises Palacio ken Donna Palacio nga agnaed iti Albew, Bekigan, Sadanga, Mt. Province; 3 sedula nga inyisio ti Baguio City ken ni Moises Palacio ken ni Neda Gudaren idi Enero 10, 2012 ken Pebrero 23, 2012; ken ti inyisio ti Sadanga, Mt. Province ken ni Bao-et Palacio idi Oktubre 29, 2911; ken personal nga aruaten.

Nangiwayat metten ti SOCO team a nakabase iti Candon City nga indauluan ni PI Calub iti crime scene processing iti nakapasamakan ti panagsaneb.#