Footer

Drinking session, nagtungpal iti pannakalmes

SANTIAGO, Ilocos Sur – Nalmes ti maysa a lalaki a di napupuotan dagiti aggiinom a kakaduana sadiay Barangay Sabangan ditoy nga ili idi malem ti Agosto 29.

Naideklara nga awanen ti biag ni Allan Paul Sanil y Mariñas, 24, naasawaan, ken residente iti Barangay Bulbulala, ditoy nga ili idi maidanon dagiti polis ken personnel ti RHU iti Candon General Hospital.

Segun iti report, napan naggiinom ti grupo dagiti lallaki a pakairamanan ti biktima ken ni Michel Sanil a kabsatna iti igid ti baybay a sakup ti nadakamat a barangay ket idi agarup ala una ti malem, nagpakada ti biktima ken ni Michel a mapan aglangoy iti baybay.

Nagbalaw ti grupo idi saan metten a timmakdang ti biktima ket sinawarda. Nakitada laengen ti biktima a tumtumpaw iti igid ti baybay.#

 

Comments are closed.