Footer

Iti iruruar ni GMA iti ospital, naiserbin ti hustisia?

Ni  Danny B. Antalan

(Umuna iti dua a paset)

 

Ania, nakaruaren ni GMA? Wen, daytoy ti saludsod ti kaadduan a Filipino idi nangegda daytoy a damag.

Naiserbi kano ti hustisia!

Daytoy ti kinuna ti kampo ni Glora Macapagal Arroyo,  ti sigud a presidentetayo iti pagilian a Filipinas.  Nagtakem kas presidente manipud 2001 agingga iti 2010.  Nagtakem pay kas senador ken bise presidente. Agdama a kongresista iti maikadua a distrito ti probinsia ti Pampanga.

Naiserbi ti hustisia… kinunada daytoy kalpasan a nakaruar iti Veterans Memorial Medical Center a nakaibaludanna gapu iti kaso nga electoral sabotage iti eleksion idi 2007.  Naaresto ken nabalud idi Nobiembre itay napalabas a tawen.  Iti Pasay City Regional Trial Court Branch 112, iti sala ni Judge Jesus Mupas, ti pakadengdenggan ti kasona.

Kalpasan ti walo a bulan, nakaruar iti ospital idi pinaboran ti korte ti puntona.  Napalubosan nga agpiansa iti P1,000,000.  Binibiitna nga imparang ti nasao a gatad.  Iti dayta met laeng a malem, nakaawid idiay La Vista Village, Quezon City a pagtaenganna a napnuan isem dagiti bibigna.  Sinarabo dagiti di nagbalbaliw a loyalistana.

Ti presidente a nakasuan gapu iti mapapati a panagkusit iti eleksion a naisayangkat idi 2007.  Eleksion met laeng ti nangipatugaw kenkuana babaen ti kontrobersial a dangadangda kenni Fernando Poe, Jr.  Nangabak kas presidente ken nagtugaw idiay Malakanyang iti uneg ti innem a tawen.  Naabak met ni FPJ a natay kalpasan ti sumagmamano a tawen.

Gapu iti pannakaruarna, naiserbin ti hustisia, kinunana.

Hustisia?  Agpapan ita, birbiroken pay laeng dagiti ama, ina, anak, kakabagian dagiti 58 nga awanan asi a napapatay a pakairamanan ti 34 nga agiwarwaragawag idiay Maguindanao babaen kadagiti nakasuan nga agama nga Ampatuan.  Manon a tawen ti napalabas, ngem nakudrep pay laeng ti paglawagan iti pannakaipaay ti hustisia kadakuada.  Ta apay ngamin a main-inut met nga agpukaw dagiti testigo iti nasao a kaso.

Hustisia met laeng ti birbiroken dagiti pamilia dagiti nagpukaw ken mapapati a napapatay kadagiti extra judicial killings a napaspasamak bayat iti panagtakemna met laeng.

Hustisia met laeng ti birbiroken ti tunggal Filipino gapu kadagiti di mailawlawag a kontrata a naglekkaban ti dadduma kas iti NBN-ZTN deal, fertilizer scam ken dadduma pay nga anomalia a mapapati a nakaisawsawan ti administrasionna.

Ngem nakaruar, ta naiserbi ti hustisia!

Apay kasdiayen, no isuda nga addaan kuarta, nabileg ken mabigbigbig iti pagilian ti mapaboran iti korte, ibagadan a naiserbi kadakuada ti hustisia.  No isuda a makabael a mangala kadagiti de-kampanilia ken mabigbigbig nga abogado.

Kasano ngay metten dagiti marigrigat, awanan iti kuarta nga agtultuloy nga adda iti pagbaludan wenno aglemlemmeng gapu kadagiti kaso a sangsanguenda, a ti dadduma ket inosente, ayanna ngarud ti kunada a hustisia?

Wenno dagiti biktima a di makabael a mangala iti nalatak nga abogado, kanayon a mangipukpukkaw iti hustisia kadagiti napasamak iti patpatgenda iti biag?  Manon aya dagiti tarpaulin, streamer, plakard ken Manila paper a naisab-it kadagiti pagtaengan, kaykayo ken kalsada iti panangbirbirokda iti hustisia?

Ngem nakaruar ta adda hustisia… kuna ti kampo ni GMA.

Kaano aya daydi ginandatna ti aglibas babaen ti panangibagana nga addaan iti nadagsen a sakit ket kasapulan a maoperaan idiay ballasiw-taaw?  Pagsayaatanna, nasiput unay ni Leila de Lima, ti sekretario ti DOJ, ket natungday ti ipapanawna koman.  Iti dayta met laeng a gundaway, naisagana ti kaso nga electoral sabotage a nakaigapuan iti pannakabaludna iti ospital.

(Maituloyto)