Footer

Lakay a dinungpar ti traysikel, grabe iti ospital

SALCEDO, Ilocos Sur – Grabe iti ospital a nakaitarayanna ti lakay a dinungpar ti traysikel idi rabii ti Agosto 27 iti national highway ti Barangay Poblacion Norte, ditoy nga ili.

Manipud iti Salcedo Medicare Community, naiyalis ni David Duro y Gironella, 58, naasawaan, ken residente iti Barangay Poblacion iti Lorma Medical Center, San Fernando City gapu iti kritikal a kondisionna maigapu iti panangdungpar kenkuana ti traysikel a minaneho ni Nathaniel Wandas y Ubuan, 31, naasawaan, ken natibo ti Sigay, Ilocos Sur ngem agdama nga agiggian iti Barangay Balidbid, Salcedo, Ilocos Sur.

Naammuan iti inbestigasion nga agpaamianan ti traysikel ket idi makadanon iti nadakamat a lugar, dinungparna ni Duro a magmagna iti akinlaud a paset ti kalsada.

Napukaw ni Wandas ti kontrolna iti manibela ket nabaliktad ti lugan a nakadunoran ti drayber ken dagiti pasaherona a nainaganan Aleni Cotillon y Magday, 24, awanan asawa, ken residente iti Barangay Bugnay, Candon City, ken ni Reuben Pasahol y Ubuan, 27, baro, ken residente iti Sigay, Ilocos sur.

Mapapati nga adda iti inpluensia ti arak ti drayber ti traysikel.#