Footer

Linteg a mangikalawa iti bileg dagiti civil registrars nga agkorehir, pinirmaan ni PNoy

VIGAN CITY – Naikalawa ti bileg dagiti local civil registrars a mangkorehir kadagiti biddut iti sertipiko ti nakayanakanan mainaig iti birth date ken gender nga awanen ti pammilin nga aggapu iti korte.

Iti phone interview ti Tawid News ken ni Susan Ancheta, city civil registrar ditoy, kinunana a pinirmaanen ni Presidente Benigno S. Aquino III idi Agosto 12 ti Republic Act 10172 a mangikalawa iti bileg dagiti lokal a civil registrars a mangatur kadagiti biddut iti petsa ti pannakayanak ken gender kadagiti birth certificates a saanen a kasapulan ti pammilin manipud iti korte.

Inamendaran ti nasao a linteg ti Republic Act 9048 wenno Clerical Error Law a naipasa idi 2001 a nangted iti otorisasion kadagiti local civil registrars a mangkorehir iti clerical errors iti maysa nga entry iti first name wenno nickname ti maysa a tao nga awan ti bilin ti korte.

Impalubos ti RA 9048 ti panangkorehir dagiti local civil registrars kadagiti clerical wenno typographical errors iti dokumento ti civil registry, malaksid kadagiti panangkorehir iti panagbaliw iti sex, tawen, nasionalidad ken estado ti maysa a tao.

Inamendaran ti RA 9048 dagiti Artikulo 376 ken 412 ti Civil Code of the Philippines a mangiparit iti pannakabaliw ti nagan wenno surname ti maysa a tao, wenno aniaman a panangatur iti entry iti civil register nga awan ti bilin ti korte.

Sakbayna, sangkadagadag ni Quezon City Registrar Ramon Matabang, presidente ti Civil Registrars for Reforms, kadagiti agilinlinteg ti pananganamongda iti bicameral conference ti consolidation ti Senate Bill 3113 ken ti House Bill 4530 a mangted iti nalawlawa a bileg kadagiti city ken municipal civil registrars a mangkorehir kadagiti biddut iti date of birth wenno sex ti maysa a tao nga awanen ti bilin manipud iti korte.

“Nasken a makorehir a dagus aniaman a biddut nga entry iti birth certificate agsipud ta napateg unay daytoy a dokumento a sapulen ti gobierno kadagiti opisial a transaksion,” nakuna ni Matabang.

Intuding pay ti kabarbaro a linteg a maipan dagiti makolekta ti city wenno municipal civil registrar wenno consul general a pagbayad para kadagiti koreksion iti birth certificate iti pundo ti maseknan a Local Civil Registry Office wenno iti Opisina ti Consul General a maaramat para iti modernisasion ti opisina wenno panangiyemplo iti kabarbaro a empleado ken iti pannakagatang dagiti supplies, kas maibatay kadagiti paglintegan ti accounting ken auditing ti gobierno.

Kinuna ni Ancheta nga iyur-urayda pay ti implementing rules and regulations para iti naan-anay a panangiyimplementarda iti nasao a linteg.#

Comments are closed.