Footer

Ma. Lourdes Sereno, ti kaunaan a babai a Chief Justice ti Supreme Court

Salaysay ni Melvin F. Bandonil

(Umuna a paset)

 

Ni Associate Justice Maria Lourdes Punsalan Aranal-Sereno ti pinili ni Presidente Benigno Simeon Aquino III a chief justice (CJ) ti Supreme Court. Ti kaunaan a babai a chief justice iti pakasaritaan ti hudikatura. Ti maikaduapulo ket uppat a pangulo dagiti mahistrado. Maipalagip nga isu pay ti kaunaan a dinutokan (appointee) ni Pres. Aquino iti Supreme Court.

Iti biang dagiti agpalpaliiw, saan a nakaskasdaaw ti pannakapilina a chief justice. Nupay adda dagiti suroten a proseso iti panagpili iti CJ, iti udina ket tinto met la presidente ti mangikeddeng. Nakasurat dayta iti Philippine Constitution a ti presidente ti agpili—presidential prerogative ti pangawagda iti dayta a banag. Kalintegan ti presidente dayta kas mangidaulo ti pagilian.

Ubing pay ni Justice Sereno iti edadna a limapulo ket dua. Naiyanak sadiay Bay, Laguna idi 1960. Nagraduar sadiay Ateneo de Manila University iti kurso nga economics. Sadiay University of the Philippines a nagraduar iti Bachelor of Laws ket isu ti immawat iti kangrunaan a pammadayaw iti daydi a tawen 1984. Sadiay University of Michigan Law School ti nagadalanna iti Master of Laws. Immawat iti pammadayaw idi 1998 a kas maysa kadagiti Outstanding Women in the Nation’s Service. Nagpaay pay a commissioner ken chairperson iti steering committee iti Preparatory Commission on the Constitutional Reform idi 1999.

No pagbasaran iti edad, agtakem a kas CJ iti uneg iti sangapulo ket walo a tawen. Agretiro—compulsory retirement—ti amin nga agtakem itoy iti edad a pitopulo. Iti dayta, maaddaan ngarud iti sangapulo ket walo a tawen a panagserbi. Manamnama ngarud nga agtakem iti babaen ti administrasion ti tallo a presidente agingga iti panagretirona. Isunto ti kapautan nga agtakem a CJ.

Malaksid kenkuana, waloda amin nga innominar ti Judicial Bar Council a pakaibilangan da Acting Chief Justice Antonio Carpio, Supreme Court Associate Justices Roberto Abad, Arturo Brion and Teresita Leonardo-de Castro, Solicitor General Francis Jardeleza, dati a Diputado Ronaldo Zamora ken dati nga  Ateneo College of Law dean Cesar Villanueva.

Napili ni Sereno iti sanguanan ti pannakaikkat ti maysa a chief justice ti Korte Suprema kalpasan a kinedngan ti Senado a nagtugaw a kas impeachment court a nakabasol iti panaglabsing iti Konstitusion gapu iti saanna a panangipalgak amin dagiti sanikuana ken depositona iti bangkona.

Maipalagip a ni Renato Corona ti impatugaw ni dati a Presidente Gloria Arroyo sumagmamano a lawas sakbay ti ibababana iti puesto kalpasan ti panangabak ni Senador (idi) Benigno “Noynoy” Aquino III iti kinapresidente iti eleksion idi 2010.

Madakamat ditoy a saan a nagustuan ni Presidente Pnoy daytoy ket imbatadna a saan nga agsapata iti sanguanan ni Corona kas tradision. Tinakderan ni Pnoy daytoy a waragawagna ket nagsapata iti sanguanan ni  Associate Justice, Conchita Carpio-Morales

Nagtalinaed a nalamiis ti langenlangen iti nagbaetan ti Presidente ken ti Chief Justice iti panaglabas dagiti bulan nga ad-adda a pinakaro dagiti sumagmamano a desision ti Korte Suprema a nangkontra kadagiti tignay wenno addang ti Ehekutibo a mangimbestiga kadagiti napalabas nga alegasion ti panagsuitik iti eleksion ken sumagmamano nga anomalia a mapapati a nakaisawsawan ti sinukatanna nga administrasion.

Madakamat ditoy ti panangbara ti Korte Suprema iti Truth Commission a binuangay ni Aquino, ti panangpaborna iti midnight appointments nga inaramid ti Arroyo administration sakbay ti yuulogna iti puesto, ken ti ibilang dagiti agpalpaliiw a kakaruan, ti panangipalubos ti Nangato a Pangukoman ti panagbiahe ni GMA nga agbiahe iti ruar ti pagilian iti baet ti kaadda ti hold order departure ti Department of Justice nga idauluan ni Secretary Leila de Lima a maparitan ni GMA a rummuar iti pagilian.

Ammotayon dagiti simmaruno a pasamak. Pinaritan dagiti otoridad ni GMA nga agbiahe, na-impeached ni Corona iti Kamara ket nausig ken kinedngan ti Senado a nagtugaw a kas impeachment court.

(Adda tuloyna)

Comments are closed.