Footer

Mannalon, nasalamaan dagiti polis nga agikut iti droga

SINAIT, Ilocos Sur – Inaresto dagiti polis ti maysa a mannalon a nasukalanda nga adda ikutna a maiparparit a droga bayat ti panagpatroliada iti Barangay Rang-ay ditoy nga ili idi rabii ti Agosto 25.

Naipakatan iti inquest proceeding ni Jerson Ibarra y Ilar, 40, naasawaan, ken residente iti Barangay Binacud, ditoy nga ili iti opisina ti provincial prosecutor, Vigan City gapu iti panaglabsingna iti RA 9165,

Bayat ti panagpatrolia dagiti polis nga indauluan ni COP PSI Arsenio T. Ramos iti bisinidad ti nadakamat a barangay, nasalamaanda ni Ibarra a suspetsoda ti tignayna.

Idi kiniddaw dagiti polis nga iruar ti suspek dagiti naguneg iti bulsana, boluntario nga impakita daytoy ti maysa a bassit a plastic sachet a mapapati a naglaon iti shabu a mapattapatta nga agdagsen iti .01 gram nga agbalor iti P200.00.

Naipan ti nakumpiska ken ni Ibarra iti PNP Crime Laboratory iti Ilocos Sur Provincial Police Office para iti pannakaamirisna.#

 

Comments are closed.