Footer

NUTRITION NEWS: Evaluation ti nominado para Most Outstanding Barangay Nutrition Scholar ti Pagilian naisayangkat

CABUGAO, Ilocos Sur – Dakkel ti namnama dagiti opisial ti Barangay Bonifacio ken barangay health workers a ti kalugaranda ditoy nga ili ti mangiyalat iti pammadayaw kas most outstanding barangay nutrition scholar iti pagilian iti daytoy a tawen.

Segun ken ni Macrina I. Saturno, mangibagi iti Region 1 iti nailian a pasalip gapu iti pannakapilina a Most Outstanding Barangay Nutrition Scholar iti Region I idi 2011, naisaganana a nasayaat dagiti kasapulan a rekord kasta met a nasungbatanna a nasayaat dagiti saludsod dagiti evaluators.

Dua nga aldaw ti naisayangkat nga evaluation ken ni Saturno a nangrugi idi Agosto 22 kalpasan ti pannakiuman dagiti evaluators ken ni Mayor Edgar S. Cobangbang, Jr.,  kas mangidaulo iti municipal nutrition council committee sakbay a nagturongda iti Barangay Bonifacio nga idauluan ni Barangay Captain Valentin S. Tuyor, Jr.

Kinuyog da National Nutrition Council Region I OIC Rose Lulu P. Pagaduan, DA Assistant Provincial Agriculturist Editha Castillo, Federated BNS President ti Ilocos Sur Widna E. Galuardo,  ken ni Municipal Nutrition Action Officer Joenah G. Sevilleja dagiti national evaluators  nga indauluan ni Assistant Secretary Maria Bernardita T. Flores.

Malaksid iti one-on-one nga interbio, naglasat pay iti written examination ni Saturno babaen ti grupo dagiti evaluators.

Iti malem, random a nagpili ti grupo kadagiti ubbing iti barangay ket aktual a natimbangda tapno makita no husto met la ti dagsenda iti tawenda.

Kabigatanna, Agosto 23, nasukimat dagiti rekord ken programa ti Barangay Bonifacio mainaig iti nutrision kas iti herbary, materials recovery facility (MRF), vegetable garden, nursery,  garbage disposal, ken waste segregation.

Kabayatanna, pinagyamanan ni Mayor Cobangbang ti “insentibo ken gannuat” dagiti kailianna a mangitandudo iti benneg ti nutrision iti ilina a pakairamanan met a pakaidayawanna kas ama daytoy nga ili.

Walo a rehion iti pagilian ti pagpilian dagiti evaluators a pakaipaayan ti most outstanding BNS iti daytoy a tawen.

Manamnama a maiwaragawag dagiti nangabak iti bulan ti Septiembre.#

Comments are closed.