Footer

Polis nakasamsamda 10 kilos a bricks ti marihuana

ALILEM, Ilocos Sur – Dua a lalaki a suspetsoso ti tignayda ti nasukalan dagiti polis nga adda ikutda a napagango a marihuana sadiay Barangay Apang ditoy nga iliidi malem ti Agosto 30.

Ti makadakes, pinadas ti maysa a pasuksokan dagiti polis tapno mapalubosanda.

Gapu iti daytoy, saan laeng a panaglabsing iti RA 9165 ti posible a sanguen da Lito Ocasen y Bagayao, 37, baro, gardener ken residente iti Sitio Dagdag, Barangay Daddaay, ken ti kaduana a ni Jayson Budas y Ocase, 21, baro, ken residente iti Sitio Nalbo, Kayapa, Bakun, Benguet,  no di pay pananggandat a mangpasuksok iti maysa a police officer.

Bayat ti panagisayangkat dagiti polis iti follow-up investigation ken intelligence monitoring iti Barangay Apang mainaig iti pammaltog a napasamak idi Agosto 25 ken 26 sadiay Sitio Dukit, nasalamaanda dagiti suspek a suspetsoso ti garawda. Idi immasideg dagiti polis, mapapati nga imbaga ni Ocasen nga adda awitda a bulong ti marihuana ket ginandatna a pasuksokan dagiti polis.

Nakasukain dagiti polis iti backpack dagiti dua iti 9 a bricks ti masuspetsa a napagango a bulong ti marihuana nga addaan fruit tops, 5 a bricks a nabungon iti cement paper bag, ken 4 a bricks a nabungon iti pagiwarnak nga agdagsen iti mapattapatta a 10 kilos nga agbalor iti sumurok kumurang P35,000.00.

Sinaksian da Barangay Captain Efren Collong ti Barangay Amilongan ti pannakainbentario dagiti nakumpiska a droga.

Naipan dagiti dua iti police station para iti dokumentasion ken disposision ket maisagsagana metten ti kaso a panaglabsing iti RA 9165 maikontra kadakuada.#

Comments are closed.