Footer

Premiona kas Most Child-Friendly City, manamnama a maalanton ti Vigan

VIGAN CITY – Kinuna ni Vice Mayor Lourdes Baquiran a manamnama a maalan ti Vigan City ti premiona kas Most Child-Friendly City kalpasan nga inaprobaran ti sangguniang panlungsod ditoy iti maysa anga special session ti kasapulan a resolusion.

Maipalagip a dua a tropeo ti inawat ti Vigan City idi napan a tawen: Presidential Award kas Most Child-Friendly city iti nagsasaganad a tallo a tawen iti Region 1, ken Most Child-Friendly City iti Component City Category.

Indauluan ni Mayor Eva Marie S. Medina dagiti city officials nga immawat kadagiti pammadayaw iti seremonia a naangay iti Malakaniang.

Malaksid ti pammadayaw, adda pay premio a kuarta a P500,000.00 manipud iti Presidential Social Fund.

Kabayatanna, kinuna ni Konsehal Loreto Quibilan a maiyalokar ti nasao a pondo para iti pannakaipasdek kadagiti 14 comfort rooms kadagiti nadumaduma a pagadalan iti sekundaria ditoy siudad.#